ضديتلی معلوماتلار اصفهان‌دا بعضی آبان اعتراضچیلاری‌نین اعدام حؤکملری‌نین تصدیقلندیگینی بیلدیریرلر
ایرانین اینسان حوقوقلاری تشکیلاتی، اصفهانین خمینی‌شهرینده 1396 ایلین دی آییندا کئچیریلن اعتراضلاردا ایشتیراک ائدن 5 نفرین اعدام قراری‌نین عالی محکمه طرفیندن تصدیقلندیگینی آچیقلادی.
بو شخصلرین کیملیگی مهدی صالحی قلعه شاهرخی، محمد بسطامی، مجید نظری کندری، هادی کیانی و عباس محمدی اولاراق اعلان ائدیلیب.
اونلاراین اؤلوم حؤکمونون عالی محکمه طرفیندن تصدیقلنمه‌سینه سبب اولان اتهام «بغی و محاربه» اولاراق اعلان ائدیلیب.
بو خبری تصدیقله‌ین موتهیملردن بیری‌نین وکیلی، بو شخصلره اعدام حؤکمونون 1398-جی ایلین بهمن آییندا اصفهان اینقیلاب محکمه‌‌سی‌نین ایکینجی شؤبه‌سینده وئریلدیگینی سؤیله‌دی.
موتهیملر محکمه‌‌ده پرونده‌لرینده یئر آلان اعترافلاری ایشگنجه آلتیندا وئردیکلرینی سؤیله‌دیلر.
ایران اینسان حوقوقلاری تشکیلاتی‌نین مودورو محمود امیری‌مقدم، وئریلن حؤکمو قینایاراق «اعتراضچیلارا وئریلن اعدام حؤکمونو توپلومدا قورخو یاراتماق و اعتراضلاری باسدیرماق اوچون اولدوغونو» دئدی.
بوندان اؤنجه، اوچ گنج آبان اعتراضلاریندا ایشتیراک ائتدیگینه گؤره اعدام جزاسینا محکوم ائدیلمیشدی، لاکین اعتراضلار یاییلدیغی اوچون جزالاری دایاندیریلمیشدی.
بو خبره جاواب اولاراق، اصفهان ایالتی‌نین محکمه اورقانی، 1396 و 1398-جی ایللرینین اعتراضلاری ایله علاقه دار 8 نفرین اعدام حؤکمونون وئریلدیگینی اینکار ائتدی.
بو محکمه‌‌نین اعلانیندا، «بو گونه قدر بو پرونده باره‌سینده عالی محکمه حاکیميتیندن هئچ بیر تصدیق آلینمادی» دئییلیب.
