صمد حیدری و رضا سلیمی تبریز حبس‌خاناسیندان اطلاعات ایداره‌سی‌نین تجرید‌خاناسینا قایتاریلیب
ایران‌وایرین الده ائتدیگی بیلگیلره گؤره، تبریزده یاشایان و بیر مدت اؤنجه حبس ائدیلمیش صمد حیدری و رضا سلیمی آدلی ایکی تورک وطنداش تبریز حبس‌خاناسیندان اطلاعات ایداره‌سی‌نین تجرید‌خاناسینا قایتاریلیب.
بیلگیلی بیر قایناغین بیلدیردیگینه گؤره، “سون گونلرده تبریز زیندانی‌نین گوونلیک شؤبه‌سینه کؤچورولدوکلری باره‌ده عائله‌‌‌لرینه بیلگی وئرمیشدیلر. آنجاق یئنیدن تبریز اطلاعات ایداره‌سی‌نین تجرید‌خاناسینا کؤچورولوبلر. بو کؤچ.رمه‌نین سببی بللی دئییل و اونلارین عائله‌‌‌لری اوچون ناراحاتلیغی آرتیریب”.
بوندان اؤنجه ۲۴ بهمن ۱۴۰۳-ده صمد حیدری و رضا سلیمی تبریز اطلاعات ایداره‌سی‌نین قوه‌لری طرفیندن حبس ائدیله‌رک شهرین اطلاعات ایداره‌سینه تحویل وئریلمیشدیر.
بو خبرین یازیلدیغی واختا کیمی بو ایکی وطنداشین حبسی‌نین سببلری و اونلارا قارشی ایره‌لی سورولن اتهاملار باره‌ده بیلگی یوخدور.
صمد حیدری بوندان اؤنجه ۱۴۰۲-جی ایلین اسفند آییندا گوونلیک گوجلری طرفیندن حبس ائدیلمیش و بیر گون سونرا گیروو قارشیلیغندا سربست بوراخیلمیشدیر. نهایت، تبریز عومومی و اینقیلاب ساوجیلیغی‌نین ۱۵-جی ایستینطاق شؤبه‌سی اونا قارشی تعقیبسیزلیک قراری چیخاریب.
Iranwire
