شاهین برزگر اینستاگرامدا سیاسی محبوسلارین سربست بوراخیلماسینی ایسته‌دیگی اوچون بیر ایل حبس جزاسینا محکوم ائدیلدی
شاهین برزگر، آذربایجانلی بیرتورک اؤیرنجی آکتیویست، تبریز اینقیلاب محکمه‌‌سی‌نین بیرینجی شؤبه‌سی طرفیندن بیر ایل تعزیری حبس جزاسینا محکوم ائدیلدی.
شاهین برزگر، 21 تیرده حاکم «رحیم حملبر»ین حاضرلادیغی و برزگرین وکیلینده وئریلدیگی ادعا اساسیندا «ایسلام جومهورییتینه قارشی تبلیغات» اتهامی ایله بیر ایل حبس جزاسینا محکوم ائدیلدی.
محکمه قراری‌نین بیر حیصه‌‌‌سینده دئییلیر: «ایالتین اطلاعات ایداره‌سی‌نین راپورونا گؤره، موتهیم بؤلوجولوک سمبل‌لاری و گؤرونتولرینی اینستاگرام صفحه‌‌‌سینده پایلاشیب و عینی اتهام اوچون حربی محکمه طرفیندن محکوم ائدیلمه‌سینه باخمایاراق، فعالیتینه داوام ائتدیریب و ائتنیک محبوسلارین شکیللرینی یاییملایاراق، سربست بوراخیلمالارینی طلب ائدیب.»
معلوماتلی بیر منبع‌یه گؤره، شاهین برزگر، کئچن ایلین آبان آییندا اوردودا خیدمت ائدرکن و اعتراض میتینقلرینده ایشتیراک ائتمه‌مه‌سینه باخمایاراق آتاسی‌نین ائوینده توتوقلاناراق، اوچ آیلیق حبسدن سونرا (77 گون گؤز آلتیندا و 21 گون حبسده)، محکمه‌‌نین سونونا قدر 600 میلیون تومن وثیقه موقابیلینده مووقّتی سربست بوراخیلدی.
بو اؤیرنجی آکتیویستین محکمه‌‌سی 20 خرداد 1399 تاریخینده، «عومومی قایدانی پوزماق» اتهامی ایله، حاکم «پیری» نین ریاستینده تبریز ایکینجی جینایت محکمه‌‌سی‌نین 112-جی شؤبه‌سینده، «قانونسوز گاماج تشکیلاتینا عضو اولماق» و «ایسلام جمهورییتینه قارشی تبلیغات» اتهاملاری ایله ده حاکم «رحیم حملبر»ین ریاستینده تبریز اینقیلاب محکمه‌‌سی‌نین بیرینجی شؤبه‌سینده کئچیریلدی.
شاهین برزگر، ایسلام جمهورییتینه قارشی تبلیغات اتهامی ایله بیر ایل حبس جزاسینا محکوم ائدیلدی و دیگر ایکی اتهامدان براعت آلدی.
بو، آبان اعتراضلاری ایله علاقه دار سون ایکی گونده آذربایجانلی آکتیویستلره وئریلن اوچونجو حبس حؤکمودور.
دونن 29 تیرده تبریزلی مدنی آکتیویست «بابک حسینی مقدم»ده 6 آی حبس جزاسینا محکوم ائدیلدی.
اؤتن ایلین آبان آییندا باش وئرن اعتراضلاردان سونرا حبس اولونان دیگر تبریزلی وطنداش «ایوب شیری»ده اینقیلاب محکمه‌‌سی‌نین بیرینجی شؤبه‌سی طرفیندن 2 ایل مدتینه تعزیری حبسه محکوم ائدیلدی.
