سیاسی فعال آیت مهرعلی‌بیگلو حبس ائدیلیب
۱۶ آبان ۱۴۰۲-ده آخشام ساعتلاریندا تبریز اطلاعات ایداره‌سی‌نین مامورلاری کئچمیش سیاسی محبوس و آذربایجانلی سیاسی فعال آیت (یوروش) مهرعلی‌بیگلونو حبس ائتدیلر.
ایران‌وایرین الده ائتدیگی بیلگیلره گؤره، چارشنبه آخشامی آخشام تبریز اطلاعات ایداره‌سی‌نین مامورلاری آیت مهرعلی‌بیگلونو بو سیاسی فعالین اتومبیلینی تعمیره آپاردیغی تعمیرخانادا حبس ائدیبلر.
بو کئچمیش سیاسی محبوسو حبس ائتمک اوچون مامورلار تعمیرخانانین صاحبینی اونا زنگ ائتمه‌یه مجبور ائتدیلر و مهرعلی‌بیگلونو بو یئره گئتدیکدن سونرا اونو حبس ائتدیلر.
آیت (یوروش) مهرعلی‌بیگلونو کئچمیش اویرنجی فعال و تانینمیش تورک سیاسی فعالیدیر. سون ایکی اونیللیکده او، مدنی و سیاسی فعالیتینه گؤره دفعه‌‌لرله توتولوب و حبس ائدیلیب.
آیت (یوروش) مهرعلی‌بیگلو ۱۳۹۱-جی ایلده بیر سیرا باشقا آذربایجانل مدنی فعاللار ایله بیرلیکده حبس ائدیلیب، او، آغیر فیزیکی و روحی ایشگنجه‌لره معروض قالیب، آیلارلا تک آداملیق حوجره‌ده حبس اولونوب و عدالتسیز بیر موحاکیمه‌ده توپلام ۹ ایل حبس جزاسینا محکوم ائدیلیب.
جناب مهرعلی‌بیگلو قئیری-اینسانی شرایطده بئش ایلدن چوخ حبس حیاتی یاشادیقدان سونرا نهایت ۱۳۹۵-جی ایلین اسفند آییندا تبریز حبس‌خاناسیندان سربست بوراخیلیب.
