سککیز بهایی وطنداش بندر عباس‌دا موحاکیمه اولوندو
بیلگیلی بیر منبع ایران‌وایره بیلدیریب کی، ۲۲ آذر ۱۳۹۹-دا شنبه گونو، اینقیلاب محکمه‌‌سی‌نین بندر عباسداکی ۳ سایلی شؤبه‌سینده حاکم بلادرین باشقانلیغی ایله سککیز بهایی وطنداشی‌نین محکمه‌‌سی کئچیریلیب.
ایران‌وایرین منبع‌لری‌نین وئردیکلری بیلگیلرده، بو بهایی وطنداشلارین کیملیکلری «آرش راسخی»، «نسیم قنواتیان»، «مارال راستی»، «فرهاد امری»، «مهناز جان نثار»، «امید آفاقی»، «مهر الله افشار» و «ادیب حق پژوه» اولاراق آچیقلانیب.
بو وطنداشلارین هامیسی، ۱۳۹۶-جی ایل فروردین آیینین سونوندا بندر عباس و قشم‌ده “بهایی اینانجینی تبلیغ ائتمک” اتهامی ایله ایسلام جینایت قانونونون ۵۰۰-جو ماده‌‌سی اساسیندا توتولدولار و ایکی آی سونرا گیروو موقابیلینده سربست بوراخیلدیلار.
محکمه طرفیندن وئریلن چاغیریشدا بو وطنداشلارا قارشی عینی اتهام نظرده توتولوب، آنجاق ۲۲ آذر تاریخینده کئچیریلن ایجلاسدا موتهیملر ایسلامی جزا قانونون ۶۱۰-جو ماده‌‌سینه اویغون اولاراق “بهایی اینانجینا گوره اؤلکه‌نین گوونلیگینه قارشی جینایت تؤرتمک اوچون گیزلی ایشبیرلیگی ” ایله اتهام و موحاکیمه اولونورلار.
