سپیده رشنو اوین ساوجیلیغینا چاغیریلیب
مجبوری حجابا اعتراض ائدن یازیچی و ادیتور سپیده رشنو اینستاگرام صفحه‌‌‌سینده اوین محکمه‌‌سینه چاغیریلدیغینی اعلان ائدیب.
بازار گونو، ۷ خرداد گونو خانیم رشنو اؤز چاغیریشی حاقیندا یازمیشدی: “یئنی پرونده آچیلیب و بو گون منه خبر وئریلدی کی، اتهامین آچیقلانماسی و یا ایره‌لی سورولن اتهام باره‌سینده جواب وئرمک اوچون اوین محکمه‌‌سینه گئتمه‌لییم.”
مجبوری حجابا اعتراض ائدن بو قادین چاغیریشینی اینستاگرامدا فعالیتی ایله باغلانتیلی اولدوغونو یازیب و بیلدیریب کی، “سانکی بو بئش اینستاگرام پوستو کیفایت ایدی.”
سپیده رشنویا وئریلن چاغیریشدا بیلدیریلیر کی، ۵ گون ایچینده ایره‌لی سورولن اتهامی ساوونماق اوچون اوین ساوجیلیغی‌نین ۱-جی شؤبه‌سینه گلسین.
۱۴۰۱-جی ایلین تیر آیینین سون هفته‌سینده سپیده رشنو حجابلا باغلی خبردارلیق ائدن حجابلی قادین رایحه ربیعی‌یه اعتراض ائتدیگی اوچون حبس اولوندو و ایشگنجه آلتیندا اؤزونه قارشی اعتراف ائتمه‌یه مجبور اولدو.
بو ایل ۲۳ اردیبهشتتده او، الزهرا بیلیم‌یوردونون ایسلامی گئییمه رعایت ائتمه‌دیگی سببیله ایکی دؤنم ائیتیمدن قاداغان ائتدیگینی آچیقلامیشدی.
ایراندا مدنی فعاللار ایله باغلی باشقا بیر خبرده ایسه ایسلام جمهورییتی‌نین گوونلیک گوجلری، امک فعالی فرهاد شیخی‌نی کرجده هشتگردده یئرلشن شخصی ائوینده حبس ائده‌رک بللی اولمایان یئره آپاریبلار.
بو امک فعالی‌نین وکیلی عرفان کرم ویسی، فرهاد شیخی‌نین حبس اولونماسی خبرینی اؤز توییتر صفحه‌‌‌سینده اعلان ائده‌رک حؤکومت گوجلری‌نین فرهاد شیخی‌نین ائوینده ده آختاریش آپاردیغینی یازیب.
فرهاد شیخی داها اؤنجه ده ایشچیلرین حوقوقلارینا دستک فعالیتینه گؤره بیر نئچه دفعه توتولوب و حبس ائدیلیب.
