سونگون میس معدنی‌نین پوزونتولاری ایله باغلی آذربایجان ملت‌وکیلی ایله دانیشیق؛ بیگیم یوخدو
«سونگون میس معدنی»، تبریزین ۷۸ کیلومتر قوزئیینده، ورزقان شهرینده یئرلشیر. ایکی میلیارد توندان چوخ ژئولوژی رزروی ایله اورتا دوغونون ان بؤیوک میس معدنیدیر. سونگون میس معدنی‌نین ایللیک گلیری تخمیناً ۱۵ مین میلیارد تومن دیر و ایرانین ان گلیرلی اقتصادی موسسه‌‌لریندن بیریدیر.
آنجاق ایللردیر سونگون میس معدنی‌نین آدی گئنیش یاییلمیش یولسوزلوق و پوزونتولار ایله باغلی دئییلیر. یولسوزلوق، سند دوزلتمه، شرکتین پروژه‌لرینی ایحاله‌سیز و قانونی گئدیشات اولمادان تحویل وئرمک، دؤولت مقاملاری‌نین یاخینلارینی قانونسوز ایشه گؤتورولمه‌سی، چئوره‌نین پوزولماسی و سونگون کندی‌نین سؤکولمه‌سی موقابیلینده معدنین مادی عهده‌‌لیکلری‌نین یئرینه یئتیریلمه‌مه‌سی معدن پوزونتولاری‌نین یالنیز بیر حیصه‌‌‌سیدیر.
ایران‌وایرین الینه چاتان سندلر گؤستریر کی، سونگون معدنی‌نین مودورلری ایله یاناشی، تفتیش قوروملاری، محکمه و تهلوکه‌‌‌سیزلیک قوروملاری، دوغو آذربایجان سئچکی دایره‌سی‌نین کئچمیش و ایندیکی ملت وکیللری سونگون میس تشکیلاتی‌نین پوزونتولاردان خبر سیز و بهره‌سیز قالمامیشلار.
سون ایگیرمی ایلده ورزقانین سونگون میس معدنینده باش وئرنلری و مجلیسین معدنله باغلی ایکی دفعه‌‌لیک آراشدیرماسی‌نین نتیجه‌لرینی ایزله‌مک اوچون دوغو آذربایجان ایالتینین مجلیسدهکی بعضی ملت وکیللری ایله دانیشماغا چالیشدیق.
مجلیسین آلتینجی و یئددینجی دؤورلرینده تبریزین کئچمیش ملت وکیلی اولان اکبر اعلمی، اوزونون تلگرام کانالیندا سونگون معدنی‌نین پوزونتولاری ایله یاناشی، او واختکی صنایع و معدنلر ناظری اسحاق جهانگیری‌یه ایکی مکتوب یازمیش و ۱۳۸۱ -۱۳۸۲-جی ایللرده جهانگیری‌دن اولان سؤالی‌نین سندلرینیده نشر ائتمیشدیر.
سونگون معدنین پوزونتولاری ایله باغلی بیر رئپورتاژ سورغوسونو جاوابلاندیرارکن، «سککیز ایل عرضینده بیر ملت وکیلی مقامیندا و اوندان تخمیناً ۱۲ ایل سونرا یولسوزلوغا قارشی تک قالدیم و اذيت چکدیم» دئدی و خالقدان و مئدیادان دستک وئرمه‌دیکلرینه گؤره گیلئیلندی و رئپورتاژ وئرمکدن ایمتینا ائتدی. آنجاق بو باره‌ده محمد عبداللهیان ایله دانیشماغیمیزی تکلیف ائتدی.
محمد عبداللهیان، سونگون میس معدنینده تهلوکه‌‌‌سیزلیک و یانغین‌سؤندورمه ایشلری‌نین کئچمیش مودورودور. جام‌جم قزئتی، «بوتون حادثه‌‌‌لر اوچون بیر آدام» باشلیقلی خبرینده محمد عبداللهیانی تقدیم ائده‌رک، «سئل، زلزله و یانغین کیمی فلاکتلی بیر حادثه‌‌‌نین باش وئردیگی اؤلکه‌نین هر بیر یئرینده دئمک اولار کی محمد عبداللهیان اورادا اولاجاق» یازیب.
محمد عبداللهیان دا دانیشماغا راضی دئییل:«سونگون معدنینده‌کی یولسوزلوغو ایفشا ائدیب دیک دورماغیمین عوضینی وئردیم. ایشدن قووولدوم، دفعه‌‌لرله توتولدوم و ایشگنجه گؤردوم، سونگون معدن مافیاسی‌نین منه و عائله‌‌‌مه تضییقلری سببیندن حیات یولداشیم سکته کئچیردی و ایندی اونون باخیما احتیاجی وار. معدنده‌کی یولسوزلوق سندلرینی دوغو آذربایجان والیسینه، اینقیلاب کئشیکچیلری اطلاعتینا، اؤلکه باش موفتیشلیگینه، محکمه اورقانلارینا و حتی جناب خامنه‌ای‌نین یاخینلارینا چاتدیریلماسی هئچ بیر نتیجه وئرمه‌دیکده، مئدیا ایله یئنیدن آپاردیغیم موصاحیبه‌مین هانسی تأثیری اولا بیلر؟”
محمد عبداللهیانین قئید ائتدیگی ایفشا ائتمه اونون «بیداری آذربایجان خبر آژانسینا (اویاقلیق) وئردیگی موصاحیبه ایله علاقه داردیر. بو موصاحیبه‌ده ایران‌وایرین راپوروندا یاییملانان قانون و ماليه پوزونتولارینا علاوه اولاراق، ماليه ایستیثماری‌نین یئنی اؤلچولرینه و سونگون میس تشکیلاتی‌نین پوزونتولاریندا تهلوکه‌‌‌سیزلیک و نظارت قوروملاری‌نین ایشتیراکینا ایشاره ائتدی.
«احمد علیرضا بیگی»، ایران‌وایرین ورزقان معدنی ایله باغلی سؤاللارینی جاوابلاندیران، دوغو آذربایجان ایالتینین تک ملت وکیلی ایدی. علیرضا بیگی، ایسلامی شورا مجلیسی‌نین اونونجو و اون بیرینجی دؤورونون ملت وکیلیدی. او، عینی زاماندا اؤلکه‌نین یول پولیسی‌نین رئیسی و دوغو آذربایجان والیسی اولوب.
علیرضا بیگی، ایران‌وایره وئردیگی موصاحیبه‌ده اؤنجه تابناک وب سایتیندا یاییملانان موصاحیبه‌سینی رد ائتدی. تابناک علیرضا بیگی‌یه ایستناداً یازیب «بو مافیا، حؤکومتی و میس معدنی‌نین مسووللاریدیر کی اؤنجه‌کی حؤکومتدن ده مؤوجود اولوب و ایندی بو حؤکومته تحویل وئریلمیش .مؤوجود حؤکومتده‌کی اینسانلارین مقاملاری ديیشمیش اولا بیلر، لاکین اونلارین آرخاسیندا هاشمی رفسنجانی و باهنر عائله‌‌‌لری دورور.»
علیرضا بیگی ایران‌وایره وئردیگی آچیقلامادا «هاشمی و باهنر عائله‌‌‌لری حاقیندا بیر شئی دئمه‌دیم» دئدی. «آنجاق کرمان مافیاسی‌نین آذربایجان خالقی‌نین سونگون میس معدنی‌نین ثروتلریندن ایستیفاده ائتمه‌سینه مانع اولدوغو باره‌ده دانیشدیم.» کئرمان مافیاسی‌نین کیم اولدوغو سؤالینا جاواب اولاراق سؤزلرینی داوام ائتدیریر: «اصلینده کرمان مافیاسی بیزی 30 فایز کنستانتره یوکله‌مه‌یه و اورادا ائمال ائتمک اوچون کرمانا گؤندرمه‌یه مجبور ائدنلردیر و بو ائمالین آذربایجاندا کئچیریلمه‌سینه ایمکان وئرمیرلر. میس یؤنتیم قورولوندا «آذربایجان میس شرکتی»نین حقیقی کیملیگینی تاپماسینا مانع اولان بیر دوشونجه وار. آرتیق بو شرکت «میلی میس شرکتی»ندن آیریلدیغی اوچون، آذربایجان میس شرکتی ایله اولان داورانیشلار ائودن قووولان بیر گنجه قارشی ائدیلن داورانیشلار کیمی اولمامالیدیر. بیز میلی میس شرکتی‌نین اورتاغیییق. آیریلیق اولاجاقسا، اؤنجه‌دن بیرلیکده ایشله‌ین ایکی اورتاق کیمی، آذربایجان میس شرکتی‌نین وارلیقلاری‌نین نیسبتلری نظره آلینمالیدیر. میلی میس شرکتی بورادان قازاندیغی ثروتله زنگین اولدو، آنجاق آیریلدیقدان سونرا آذربایجان میسینه هئچ نه وئرمه‌دیلر.»
۱۳۹۲-جی ایلده «میلی ایران میس صنایع‌سی شرکتی»نین میس هلدینگه چئوریلمه‌سی ایله، اؤنجه «آذربایجان مولیبدن -میس‌نین معدن و صنایع‌سی شرکتی» و سونرا «کرمان میس شرکتی»، مستقل شرکتلر کیمی قورولدو. بوندان اؤنجه میلی ایران میس شرکتی کرمان مرکزلی فعالییت ائدیردی. آذربایجان مولیبدن -میس معدن صنایع‌سی شرکتی‌نین سایتیندا یئر آلان بیلگییه گؤره، میس هلدینگی‌نین یارادیلماسیندان مقص «هر بؤلگه‌نین پتانسیلی و ایالتلرده‌کی اقتصادی گلیشمه‌دن ایستیفاده ائتمکدیر.»
احمد علیرضا بیگی، میلی میس شرکتی‌نین مجلیس آراشدیرمالارینین نتیجه‌سیز قالماسی‌نین سببلری حاقیندا بونلاری سؤیله‌ییر: «ایسلام مشورت مجلیسی تاریخینده فایدالی و تأثیرلی بیر نتیجه الده ائده بیلمه‌ین آراشدیرما یالنیز میس شرکتی‌نین آراشدیرماسی دئییل. بلکه باش وئرن بوتون آراشدیرمالار سونوجسوز قالیب. باش وئرن قارشیدورمالار و مؤوجود مولاحیظه‌‌لر، هابئله موختلیف عامللر یالنیز آراشدیرمالاری دئییل، ایران ایسلام جمهوریییتی‌نین مجلیسی‌نین ده مؤوجودلوغونون تهدید آلتینا آلیب.»
علیرضا بیگی، محکمه اورقانی‌نین آراشدیرما راپورلارینی ایزله‌مک اوچون مجلیسله ایشبیرلیگی ائدیب ائتمه‌دیگی سؤالینا جاواب اولاراق، بونلاری سؤیله‌دی: «محکمه اورقانینی مودافیه ائده‌جک قصدیم یوخدور، آنجاق بو اورقانا جینایت عملی باره‌ده بیلگی وئریلرسه، هئچ اولماسا اؤز گؤروینی یئرینه یئتیرمک آدینا پرونده‌یه داخیل اولاجاق؛ مگر مجلیس پوزونتونون باش وئردیگینی گؤستره بیلمسه.»
بو ملت وکیلی بونا جاواب اولاراق کی، «ان آزیندان سونگون میس تشکیلاتی ایله علاقه دار اولاراق مجلیس آراشدیرماسیندا پوزونتو سندلری وار و سونگون میس معدنی‌نین کئچمیش چالیشانی محمد عبداللهیان دا دوغو آذربایجان ایالتینین والیسی اولدوغونوز دؤورده سونگون میس پوزونتولاری‌نین سندلرینی سیزه تقدیم ائتدیگینی ادعا ائتدی؟» او دئییر: «جناب عبداللهیانی تانیمیرام و هئچ کیم منه سند وئرمه‌ییب. منیم دلیلیم وارسا، بو بؤیوک مسوولیتدیر و اونو ان یوکسک سويه‌‌ده اوزه چیخارارام.»
احمد علیرضا بیگی، ایران‌وایر ایله صؤحبتی‌نین سونوندا سونگون میس تشکیلاتینداکی پوزونتولار و یولسوزلوق مؤوضوسوندا هئچ نه بیلمه‌دیگینی دئییر. آما عینی حالدا اونونجو مجلیسدهکی گؤروی مدتی ایله عینی واختدا مجلیس میس سونگونون باره‌ده ایکینجی آراشدیرماسینی آپاردی. میلی میس شرکتی‌نین بو دؤورده آپاردیغی آراشدیرما نتیجه‌لری، مجلیسده نظردن کئچیریلدیکدن سونرا، ۱۳۹۸-جی ایلین اردیبهشت آییندا محکمه اورقانینا گؤندریلمیشدیر.
بو آرادا محمد عبداللهیان داها اؤنجه اینستاگرام صحیفه‌‌‌سینده احمد علیرضا بیگی ایله گؤروشمه‌سی و سونگون معدنینده‌کی پوزونتولارا دایر سندلرین چاتدیریلماسی باره‌ده معلومات وئردیگی «گویا قزئتی»نین بو گؤروشمه‌دن چکدیگی شکلینی یاییملامیشدی. عبداللهیان آیریجا علیرضا بیگی ایله بیرلیکده الینده بیر پانکاردین شکلینی ده پایلاشیب کی اوستونده بئله یازیب: «سونگون معدنی حاقسیزلیقدا بوغولور، نییه فریادینا یئتیشن یوخدور ؟»
