بو قوروم اؤز آچیقلاماسیندا وورغولاییر کی، الده ائتدیگی بیلگیلره اساساً، حبسده اولارکن ایشگنجه‌لره معروض قالان بو کئچمیش سیاسی محبوس ایسلام جمهورییتی‌نین ایللرله هده‌-قورخو و دایمی تضییقلری سوجوندا جدی زیانلار گؤروب.

بو سؤز آزادلیغی تشکیلاتینا گؤره، حتی دمیر بارماقلیقلار آرخاسیندا اولمادیغی واختلاردا دا کیانوش سنجری ایسلام جمهورییتی یئتکیلیلری طرفیندن داواملی تضییقلرله اوزلشیب.

“سرحدسیز گازئتئجیلر”ین اورتا دوغو شؤبه‌سی‌نین رئیسی جاناتان دگر دئییب: “کیانوش سنجری‌نین اؤلومونون قارشیسینی آلماق مومکون اولان فاجعه‌‌‌دیر. او، صادق ژورنالیست و اینسان حاقلاری‌نین جسور ساوونوجوسو کیمی یاددا قالاجاق. ایللرله حبس‌خانادا پیس رفتار و ایران رژیمی‌نین تهدید و تعقیبلری اونون ساغلیغینی محو ائدیب. بیز اونون اؤلومو ایله باغلی مستقل آراشدیرما طلب ائدیریک و ایران حاکیميتینی ایران‌دا ژورنالیستلره قارشی آمانسیز تضییقلره گؤره کیانوش سنجری‌نین اؤلومونه گؤره سوروملولوق داشیییریق”.

سرحدسیز گازئتئجیلر تشکیلاتی اؤز آچیقلاماسیندا وورغولاییب کی، ایسلام جمهورییتی ژورنالیستلر اوچون تهلوکه‌‌‌لی موحیط یاراتماقلا ایرانی مئدیا فعالیتی و ژورنالیستلر اوچون ان تهلوکه‌‌‌لی اؤلکه‌لردن بیرینه چئویریب.

بو قوروم بو گونه قدر ۲۵ ژورنالیستین ایشلرینه گؤره حبسده اولدوغونو، دمیر بارماقلیقلار آرخاسیندا و یا سورگونده اولمایانلار دا داخیل اولماقلا ایرانلی ژورنالیستلرین ده دایم حبس و یا زوراکیلیق تهلوکه‌‌‌سی ایله اوزلشدیگینی بیلدیریب.

کیانوش سنجری ۲۳ آبان‌دا ایراندا سیاسی فعاللارین حبسلری‌نین داوام ائتمه‌سینه اعتراض اولاراق حیاتینا سون قویوب.

Iranwire