سراواندا ۱۳ یاشلی اوشاق نیکاحلی قیز دوغوش سیراسیندا حیاتینی ایتیردی
ائولیلیگی‌نین ایلک ایلینده حامیله قالان ۱۳ یاشلی اوشاق نیکاحلی قیز دوغوش سیراسیندا حیاتینی ایتیردی.
بلوچ فعاللاری کامپانییاسینا گؤره اوشاغین کیملیگی “ح. سپاهی” اولاراق آچیقلانیب کی ۴ تیر ۱۴۰۰ جوما گونو سراوانداکی رازی خسته‌خاناسیندا، دوغوش سیراسیندا حیاتینی ایتیریب.
بیلگیلره گؤره، بو قیز ۱۲ یاشیندایکن بیر ارکک ایله ائولندی و اوچ آیدان آز مدتده حامیله قالدی.
بوندان اؤنجه سیستان و بلوچستان ایالتی والیلیگی‌نین قادین و عائله باش مودیری فاطمه فاضلی، بو ایالتین ایرانین اوچونجو بؤیوک اوشاق ائولیلیگی باش وئرن ایالت اولدوغونو سؤیله‌دی. رقملر فاضلی‌نین سیستان و بلوچستاندا “ائولیلیکلرین یوزده ۳۰-دان چوخونون قئیدیاتا آلینمادیغینی” تصدیقله‌دیگی حالدا اورتایا چیخیر.
روحی و دویغوسال تراوما، جینسی یوللا اؤتورولن خسته‌لیکلر و رحم آغزی سرطانی، حامیله اوشاقلاردا اؤلوم ریسکی‌نین یئتکین قادینلارا نیسبتاً داها یوکسک اولماسی، قادینلارا قارشی ائو ایچی شدتین آرتماسی و ائیتیمدن محروم اولماق اوشاق نیکاحی‌نین نتیجه‌لریندندیر.
iranwire
