سالار طاهر افشار، الکترونیک آیاق قاندالی ایله اورمیه حبس‌خاناسیندان سربست بوراخیلدی
آذربایجانلی مدنی فعال سالار طاهر افشار، بو گون ۲۸ تیر ۱۴۰۰-ده جزاسی‌نین سونونا قدر الکترونیک آیاق قاندالی ایله اورمیه مرکزی حبس‌خاناسیندان سربست بوراخیلدی.
بو آذربایجانلی فعال محکمه ضابیطلری طرفیندن ۳۰ فروردین ۱۴۰۰-ده آتاسی‌نین ائوینده توتولدو و بیر ایل حبس جزاسینی چکمک اوچون اورمیه مرکزی حبس‌خاناسینا کؤچورولدو.
بوندان اؤنجه بو آذربایجانلی فعالا ایلکین محکمه‌‌ده وئریلن ۴ ایللیک حبس حؤکمو، ۱۳۹۹-جو ایلین اسفند آییندا باتی آذربایجان تئمییز محکمه‌‌سی‌نین ۱۳ سایلی شؤبه‌سی طرفیندن حاکم علیپور و حاکم رجبی‌نین باشقانلیغی ایله “رژیمه قارشی تبلیغات” اتهامی ایله بیر ایل حبس جزاسینا ائندیریلمیشدی.
داها اؤنجه‌ده سالار طاهر افشار، ۲۶ تیر ۱۳۹۹-دا جوما آخشامی گونو، ایکینجی قاراباغ ساواشی زامانی اورمیه شهری‌نین اطلاعات و گوونلیک پولیسینه (۹ پله) چاغیریلدیقدان سونرا توتولدو و ۳۱ تیر ۱۳۹۹-جو ایلده محکمه‌‌نین سونونا قدر ۵۰ میلیون تومن گیرووو قارشیلیغیندا مووقتی اولاراق سربست بوراخیلدی.
