ساغلام بیر چئوره‌یه ال تاپماق؛ یئنی انسان حاقلاری
بیرلشمیش میللت‌لر تشکیلاتی‌نین انسان حاقلاری شوراسی ساغلام و تمیز بیر چئوره‌یه ال تاپماغی، یئنی انسان حاققی اولاراق قطعنامه شکلینده قبول ائتدی.
چینارین وئردییی معلوماتا گؤره، انسان حاقلاری شوراسی‌نین (۴۸.۱۳) ساییلی قطعنامه‌سی دونیا اؤلکه‌لرینی یئنی تانینان بو حقوقون حیاتا کئچیریلمه‌سی اوچون بیر-بیرلری و دیگر طرفداشلارلا ایش بیرلیییه چاغیریر.
قطعنامه لایحه‌‌سی‌نین متنی کاستاریکا، مالدیو، مراکش، اسلوونی و سوئیس طرفیندن تقدیم ائدیله‌رک، ۴۳ موافق رأی‌ین یانی سیرا، روسیه، هندوستان، چین و ژاپونون ۴ بی‌طرف رای ایله قبول ائدیلمیشدیر.
انسان حاقلاری شوراسی ایکینجی قراریندا (۴۸.۱۴)، اقلیم ده‌ییشیکلییی‌نین انسان حاقلاری اوزرینده‌کی تاثیر‌لرینه اؤزل بیر راپورتورژ (گزارشگر) تخصیص وئردی.
یئنی قطعنامه، اقلیم ده‌يیشیکلییی و چئوره‌نین پوزولماسی‌نین دونیادا میلیونلارجا انسانا ووردوغو ضرری رسمیته تانیییر.
قطعنامه، هابئله ان حساس طبقه‌لرین اقلیم ده‌يیشیکلیییندن و ساغلام اولمایان چئوره‌دن داها چوخ تاثیرلندیکلرینی وورغولاییر.
قطعنامه، گلاسکودا کئچیریله‌جک اهميتلی اقلیم ده‌يیشیکلییی اجلاسیندان (COP۲۶) بیر نئچه هفته اول قبول ائدیله‌جک. اجلاسین نویابردا کئچیریلمه‌سی پلانلاشدیریلیر.
بوندان اؤنجه بیرلشمیش میللت‌لر تشکیلاتی‌نین باش کاتیبی آنتونیو گوترش؛ دونیا لیدرلری گولخانا گازی تولیدی‌نین قارشیسینی آلماق اوچون داها گوجلو تدبیرلر گؤرمه‌دیکجه، گلاسکو اقلیم اجلاسی‌نین اوغورسوزلوق تهلوکهسی ایله اوزلشدییینی بیلدیرمیشدی.
عموم دونیا ساغلیق تشکیلاتی‌نین معلوماتینا گؤره، بوتون قلوبال اؤلوملرین یوزده ۴۲-دن بیری و یا ایلده ۱۳.۷ میلیون اؤلوم هاوانین چیرکلنمه‌سی و شیمیایی ماده‌‌لره معروض قالماسی سببیندن باش وئریر.
