زنجان حبس‌خاناسیندا ۹۰ محبوس اعدام سیراسیندادیر
ایرانین اینسان حاقلاری قایناقلاری‌نین وئردیگی بیلگیلره گؤره، زنجان مرکزی حبس‌خاناسیندا ۹۰ محبوس چئشیدلی اتهاملارلا اعدام حؤکمو آلتیندادیر.
ایران اینسان حاقلاری تشکیلاتی راپوروندا بیلدیریب کی، ایران عالی محکمه‌‌سی طرفیندن اعدام حؤکملری تصدیق ائدیلن ۹۰ محبوس “نارکوتیک”، “قصداً آدام اؤلدورم”، “سلاحلی سویغونچولوق” و “زورلاما” اتهاملاری ایله زنجان مرکزی حبس‌خاناسیندا ساخلانیلیر.
بو راپروا گؤره، “بو ۹۰ محبوسون چوخو نارکوتیکله باغلی، ۴ نفری ایسه زورلاما اتهامی ایله اعدام جزاسینا محکوم ائدیلیب”.
بوندان اؤنجه قزل‌حصار حبس‌خاناسیندا حبسده اولان ۱۰ سیاسی محبوس ایسلام جمهورییتی محکمه اورقانلاری طرفیندن اعدام حؤکملری‌نین وئریلمه‌سی و ایجراسینا قارشی “قارا چارشنبه آخشامی” آدلی هفته‌لیک اعتراض آکسییاسیندا چارشنبه آخشامی آجلیق آکسییاسی کئچیره‌جکلرینی بیان ائتمیشدیلر. باشقا حبس‌خانالارداکی اؤنملی سایدا سیاسی محبوس طرفیندن موثبت قارشیلانمیشدی.
سیاسی محبوسلارین اعداما قارشی یئنی اعتراض دالغاسی گنج اعتراضچی محمد قبادلونون جزاسی‌نین ایجراسیندان سونرا، اوین حبس‌خاناسی‌نین قادین بندینده‌کی سیاسی و ویجدان محبوسلارین بیر گونلوک آجلیق آکسییاسی و بیرگه آکسییاسی ایله باشلادی و قزل‌حصاردا سیاسی محبوسلارین هفته‌لیک اعتصاب اعلانی ایله داوام ائتدی.
مجاهد کورکور، رضا رسایی، فاضل بهرامیان، مهران بهرامیان، محمدجواد وفایی ثانی، منصور دهمرده، و عباس دریس، اعدام تهلوکه‌‌‌سی ایله اوزلشن اعتراضچیلار آراسیندادیر.
داها اؤنجه اینسان حاقلاری تشکیلاتلاری‌نین ایستاتیستیکاسینا گؤره، ژانویه آییندا محکمه سیستمی ۳۵ اعدام حؤکمو چیخاریب کی، بو دا سون بیر ایل بیر آیدا ان چوخ وئریلن اعدام حؤکمودور. بو راپورا گؤره، بو آی ایچینده اؤلکه اوزره توپلام ۸۶ نفر اعدام ائدیلیب.
۲۰۲۳-جو ایلین ژانویه آییندان ۲۰۲۴-جو ایلین ژانویه‌سینه قدر اعدام حؤکملری‌نین وئریلمه‌سی و ایجراسی گؤستریر کی، ایجرا اولونان اعداملارین سایی چیخاریلان یئنی اعدام حؤکملری‌نین ساییندان داواملی اولاراق چوخ اولوب.
