زنجانین ۶ شهری کرونا باخیمیندان قیرمیزی وضعیتده‌دیر
زنجان طب علملری بیلیم‌یوردونون رئیسی زنجان ایالتینده‌کی ۶ شهرین کرونا وضعيتی‌نین قیرمیزی اولدوغونو و ۶۱۵ کرونا خستهسینین ایالتین طب مرکزلرینده خسته‌خانایا یئر‌لشدیریلدیگینی آچیقلادی.
پرویز قزلباش، ایالتده‌کی ساغلاملیق قایدالاری‌نین رعایت ائدیلمه‌سینی وورغولادی و دئدی: اینسانلار واکسن ووردوغو اوچون ماسک تاخماغا احتیاج اولمادیغینی دوشونمه‌مه‌لیدیرلر، آنجاق ایلین سونونا قدر هر کس ماسک ایستیفاده ائتمه‌لیدیر.
زنجان طب علملری بیلیم‌یوردونون رئیسی، زنجان، ابهر، خرم‌دره و خدابنده شهرلری‌نین دؤردونون قیرمیزی، طارم، ماهنشان و سلطانیه شهرلری‌نین نارینجی، ایجرودون ایسه ساری اولدوغونو بیلدیردی و دئدی: دونندن بری هم ماهنشان، هم ده طارم شهرلری قیرمیزییا دؤندو.
او ۶۱۵ کرونا خستهسینین زنجان ایالتینده خسته‌خانایا یئر‌لشدیریلدیگینی بیلدیردی و دئدی: سون بیر نئچه گونده ایالتده کرونا خسته‌لری‌نین سایی آزالدی.
قزلباش، اوفیسلرده سوسیال مسافه‌‌یه رعایت ائتمه‌لی و لازیمی هاوالاندیرما ائدیلمه‌لی اولدوغونو وورغولادی و بونلاری سؤیله‌دی: هاوالاندیرما یولوخما میقدارینی آزالدیر و کرونادان قورتولماغین تک یولو ساغلاملیق قایدالارینی رعایت ائتمکدیر.
iranwire
