روحانی: شنبه گونوندن اعتباراً بوتون قیرمیزی شهرلرده ۱۰ گونلوک محدودیت تطبیق ائدیله‌جک
ایرانداکی کرونا بؤحرانی‌نین آرتماسیندان سونرا حسن روحانی کرونا ایله موباریزه قرارگاهی‌نین اوتوروموندا ۲۱ فروردین شنبه گونوندن اعتباراً بوتون قیرمیزی شهرلرده ۱۰ گون بویونجا محدودیتلر تطبیق ائدیله‌جه‌یینی اعلان ائتدی.
بو اوتورومدا، هر ایالتین قیرمیزی و نارینجی استاتوسلو مرکز و شهرلرده‌کی قرارگاهلاری‌نین، اصناف، ترافیکده و اوفیسلرده ایشچیلرین وارلیغیندا بوتون لازیمی محدودیتلری دقتله تطبیق ائتمه‌سینه قرار وئریلدی.
بو ۱۰ گونلوک محدودیتلرله باغلی آیرینتیلی بیلگی هله آچیقلانماییب.
کرونا ایله موباریزه قرارگاهی‌نین اوتوروموندا، عینی زاماندا، کرونا تستی موثبت اولان و قرنطینه‌نی رعایت ائتمه‌ینلرین قانونی اورقانلارا تقدیم ائدیلمه‌سی و جزالاندیریلماسی قرارا آلیندی.
بو گؤروشده حسن روحانی، خالق طرفیندن ساغلاملیق قایدالاری‌نین رعایت ائدیلمه‌مه‌سی‌نین اؤلکه‌ده کووید ۱۹ خسته‌لیگی‌نین گؤرولمه و خسته‌خانایا قالدیریلما سببی اولدوغونو و بوندان اؤتورو بیر چوخ ایالت و شهرین بو خسته‌لیگین یئنی بیر دالغاسی ایله قارشیلاشدیغینی دئدی.
آنجاق دونن، ایرانین صحیه ناظری‌نین معاونی ایرج حریرچی، کرونا اپیدمیسی‌نین یئنیدن جانلانماسیندا کرونا قرارگاهی‌نین بعضی عضولرینی گوناهلاندیردی و آدلارینی چکه بیلمه‌دیگینی سؤیله‌دیگی بعضی میلی قرارگاه عضولری‌نین ” کرونا آلوولارینی سؤندورک اوچون بایرامداکی فورصتین قارشیسینی آلدیغینی “سؤیله‌دی .
سون رسمی ایستاتیستیکادا، ایران صحیه ناظرلیگی‌نین سؤزچوسو جوما آخشامی گونو ۱۸۵ یئنی خسته‌نین اؤلدویونو و ۲۲ مین ۵۰۰-دن چوخ اینسانا سون ۲۴ ساعت ایچینده کرونا تشخیصی قویولدوغونو اعلان ائتدی.
بئله‌لیکله، ایراندا کووید ۱۹ خسته‌لری‌نین رسمی ایستاتیستیکاسی ۲ میلیون ۶ مین ۹۳۴ نفره و توپلام ایتکی سایی ۶۳ مین ۸۸۴ نفره چاتدی.
iranwire
