روحانی‌نین آنایاسا قورویوجولاری شوراسی‌نین قرارینا تپکیسی: رهبره مکتوب یازدیم
ایران جمهورباشقانی ۱۴۰۰ جمهورباشقانلیغی آدیالاری‌نین صلاحییتی‌نین سونوجلاریندان سونرا ایسلام جمهوریییتی‌نین رهبرینه بیر مکتوب یازاراق سئچکیلرده رد اولونموش بعضی آدایلارین تصدیقلنمه‌سینی ایسته‌دیگینی سؤیله‌دی.
حسن روحانی بو گون، ۵ خرداد ۱۴۰۰-جو ایل تاریخینده تشکیل ائدیلمیش بیر کابینه اوتوروموندا، ایسلام جمهوریییتی‌نین رهبری‌نین بو مسئله‌‌لرده اؤنجه‌کی دؤورلرده داها آز “داخیل اولدوغونو” ادعا ائتدی، لاکین بعضی حاللاردا بعضی آدایلارین حؤکومت فرمانی ایله تصدیقلندیگینی سؤیله‌دی.
حسن روحانی، مکتوبون مضمونو و یا حؤکومت فرمانی آلماق اوچون تکلیف اولونان آدایلارین آدلاری باره‌ده آیرینتیلی بیلگی وئرمه‌دن دئدی: “ناچار قالاراق رهبرین خیدمتینه بیر مکتوب یازدیم و دوشوندوکلریمی پایلاشدیم. او دا نئجه مصلحت گؤرورسه ائله ائده‌جکلر. منیم اوچون ایلک هدف اینسانلارین ماکسیموم ایشتیراکیدیر.”
آنایاسا قورویوجولاری شوراسی ۱۳-جو جمهورباشقانلیغی سئچکیلری اوچون ۵۸۵ آدایین صلاحییتینی رد ائتدی و دونن صلاحییت وئردیگی یئددی آدایین آدینی آچیقلادی.
علی لاریجانی، اسحاق جهانگیری، محمود احمدی‌نژاد و مسعود پزشکیان ان تانینمیش رد اولونموش آدایلاردیر.
کئچمیش مجلیس باشقانی علی لاریجانی‌نین رد ائدیلمه‌سی باشقا آدایلاردان داها چوخ دقت چکدی و ایران داخیلینده و خاریجده‌کی بیر چوخ تانینمیش سیاسی فعالین تپکیسینه نه‌دن اولدو.
روحانی حؤکومتی “سئچکی یؤنتیجیسی” آدلاندیردی و آنایاسانین ۱۱۳-جو ماده‌‌سینه گؤره جمهورباشقانی اولاراق صلاحییتلرین رد ائدیلمه‌سی و آنایاسا پوزونتوسو باره‌ده خبردارلیق ائده بیله‌جه‌یینی سؤیله‌دی، لاکین آنایاسا قورویوجولاری شوراسی داها اؤنجه جمهورباشقانی‌نین آنایاسا پوزونتوسو باره‌ده خبردارلیق ائده بیلمه‌یه‌جه‌یینی اعلان ائتمیشدی.
حسن روحانی، سئچکیلرین جانلیلیغینی آدایلارین آراسینداکی رقابت آدلاندیراراق، “بونو سئچکیدن گؤتورسه‌نیز، بدنی جانسیز اولاجاق و ییخیلاجاق” دئدی.
او آرتیردی: “جمهورباشقانی خاریجی دانیشیقلاردا ایران خالقینی تمثیل ائتمه‌لیدیر. تانری قوروسون، بیر سئچکیده کیچیک بیر ایشتیراک وارسا، او زامان میلی ماراق و سیستمین دونیاداکی گوونلیگی و پرستیژی نه اولاجاق؟“
۱۴۰۰ جمهورباشقانلیغی آدایلاری‌نین رسمی اعلانیندان و ایران مجلیسی‌نین کئچمیش باشقانی علی لاریجانی‌نین صلاحییت آلا بیلمه‌مه‌سیندن بیر ساعت سونرا، او آنایاسا قورویوجولاری شوراسی‌نین قرارینی قیسا آچیقلامالارلا قبول ائتدی و یازدی “تانری‌نین راضیلیغیندان راضییام.”
iranwire
