رسول رضانین دوغوم گونو موناسیبتیله: ابراهیم ساوالان
رسول رضا، یولداشی نیگار رفیع‌بیلی و اونلارین اوغلو آنار، آذربایجان ادبیاتی‌نین قیزیل عاییله‌لریندن حساب اولورلار. گؤی‌چایدا دوغولان رسول، ایگیرمی یاشیندا باکییا کؤچوب، باکیدا مکتب یولداشی عبداله فاروق واسیطه‌سیله ایله میکاییل رفیعلی، سلیمان رستم، مهدی حسین، صمد ووروغون، میکاییل موشفوق، علی ناظیم و میرزه ابراهیموف کیمی یازارلارلا تانیشیب، اونلارلا بیرگه آذربایجان یئنی ادبیاتی‌نین اؤنجوللریندن اولموشدو.
رسول نیگارلا ائله همن ادبی درنکده تانیشمیشدی. نیگارین آتاسی خودادات، رسولزاده دؤورونده صحیه ناظیری اولدوغونا گؤره، شوروی جلادلاری طرفیندن گولـله‌لنمیشدی. او حادیثه نیگارین یئددی یاشیندا باش وئرسه ده، ائله فاجیعه‌لر هئچ زامان رسول و نیگارین حایاتیندان اوزاق اولمادی. شوروی حکومتی تورک لاتین الفباسی‌نی کیریله چئویرنده، رسولون مکتب یولداشی فاروق بو سیاسته اعتراض ائتدی. فاروق اجباری اولاراق ساواش جبهه‌سینه گؤندریلدی و همن جبهه‌ده اؤلدو. رسول چوخ سونرالار دوستو ثابیت رحمان‌نین اؤلوم خاطیره‌سینه یازدیغی شعرینده، همن درنه‌یی، استالین امریله گولـله‌لنمیش میکاییل موشفوقو و باشقالارینی حسرتله یاد ائتمیشدی:
ایندی چؤرک دوکانیدیر
او ایلک تانیشلیغیمیز،
ایلک حایات مکتبیمیز،
ایلک موباریزه مئیدانیمیز،
سئوینجیمیز،
هیجانیمیز
اولان یئر.
ایندی سن یوخ،
موشفوق یوخ،
فاروق یوخ،
مهدی یوخدو.
تک نئجه قاییدیم او گونلره
نئجه کئچیم او یولو؟
ایکینجی دونیا ساواشیندا، رسول رضا بیر قوروپ سیاسی ایشچیلرله حربی مخبر کیمی کیریما گئدیب، او ساواشدان جانلی راپورلار یازیب، کیریم تورکلری‌نین باشلارینا گلن فلاکتی بئله‌جه‌سینه آچیقلامیشدی:
او یئرده‌کی سرین سولار چاغلایاردی دوپ‌دورو
ائللر گؤردوم کوله دؤنموش، چایلار گؤردوم قوپ‌قورو.
قوجا گؤردوم اییلمیشدی سینه‌سینه آغ باشی
باجی گؤردوم، یئرده دیری باسدیریلمیش قارداشی.
آنا گؤردوم بیر گئجه‌ده قاراساچی آغارمیش
گؤیدن سوردوم: یای گونونده بولوددان قار یاغارمیش؟
کیریمدان باکییا قاییدان رسول رضا، بوتای آذربایجان‌ین تاریخینی ابدیلشدیرمک مقصدیله تبریزه گلدی. بوتایلی رضا دقتی‌نین کامئراسی، قاراباغین بیرینجی ساواشیندا باش‌وئرن جنایتلری و ایکینجی ساواشیندا سرگیله‌نن رشادتلری دونیایا یانسیتدیغی کیمی، اوتایلی رسول رضانین کامئراسی دا، بیر ایللیک مختار حکومتیمیزین ایمدادینا گلیب، قازانجلاریمیز و هیجانلاریمیزی ثبت‌ائدیب ابدیلشدیردی و ایندی میللی حکومتدن یادگار قالان فیلیملر و شکیللرین بیر چوخوندا رسول رضانین ایمضاسی گؤرونمکده‌دیر.
