دوغو آذربایجان‌دا سون ۴ آیدا باش وئرن قضالاردا ۳۴۹ نفر حیاتینی ایتیریب
دوغو آذربایجانین عدلی طب باش مودیری مهرداد ستاره بیلدیریب کی، بو ایلین ایلک ۴ آییندا بو ایالتده یول قضالاریندا ۳۴۹ نفر حیاتینی ایتیریب.
او، آرتیریب: اؤلنلرین سایی‌نین ۳۴۴ اولدوغو کئچن ایلین عینی دؤورو ایله موقایسه‌‌ده، بو ایستاتیستیکا یوزده بیر آرتیب.
دوغو آذربایجان ایالتی‌نین عدلی طب مودیری دئییب: بو دؤورده یول قضالاریندا اؤلنلرین توپلام ساییندان ۲۸۴ نفری ارکک و ۶۵ نفری قادین اولوب و اونلارین هر بیری‌نین ایستاتیستیکاسی سیرا ایله یوزده ۱۱ آرتیش و یوزده ۲۷ آزالما یاشاییب.
ایالتین عدلی طب مودیری بو ایلین تیر آییندا ایالتده باش وئرن یول قضالاری سونوجوندا ۸۸ نفرین حیاتینی ایتیردیگینی آچیقلادی و دئدی: بو رقم کئچن ایلین عینی دؤورو ایله موقایسه‌‌ده یوزده بیر آزالیب کی، اونلاردان ۷۴ نفری ارکک و ۱۴ نفری قادین ایدی.
او دئییب: بو ایلین تیر آییندا یول-نقليّات حادثه‌‌‌لری سونوجوندا ۷۶۹ نفر یارالی عدلی طبه شؤبه‌لرینه گؤندریلیب کی، بو دا اؤتن ایلین عینی دؤورو ایله موقایسه‌‌ده یوزده ۷ آزالمانین اولدوغونو گؤستریر.
آذربایجانین چئشیدلی شهرلرینده یوللارین دورومو، یاتیریملارین اولماماسینا گؤره یاخشی دئییل و بو دا بو بؤلگه‌ده هر ایل مینلرله اینسانین اؤلومو و یارالانماسینا سبب اولور.
خاطیرلاداق کی، دونیا اؤلکه‌لری آراسیندا ایران یول قضالاری‌نین ایستاتیستیکاسینا گؤره بیرینجی یئرده‌دیر.
داها اؤنجه پولیس قوه‌لری‌نین چئشیدلی کوماندیرلری ایران یوللاریندا تئکنیکی پوزونتولار و یا یئرلی کئیفيتی‌نین آشاغی اولماسی ایله باغلی سوسور، بونون اساس گوناهکاری دؤولت قوروملاری اولان قضالارین سببلرینده یالنیز خالقی گوناهلاندیریردیلار.
