داریوش مهرجویی و وحیده محمدی‌فرین قاتیلی حبس ائدیلیب
تسنیم حؤکومت خبر آژانسی، بو گون، جوما آخشامی، ۲۷ مهر ۱۴۰۲، پولیس سؤزچوسونه ایستناداً، تانینمیش ایرانلی یؤنتمن “داریوش مهرجویی” و اونون حیات یولداشی و یازیچی “وحیده محمدی‌فر”ین قاتیلی‌نین حبس اولوندوغونو اعلان ائتدی.
بو خبرده قاتیلین حبس ائدیلنلر آراسیندا اولدوغو سعید منتظرالمهدی‌نین وورغولانماسی ایله بئله ایفاده ائدیلیر: “بیر نئچه دقیقه اؤنجه پولیسین اؤنجه‌کی ساخلادیقلاری آراسیندا اولان قاتیل تئکنیکی تدبیرلر حیاتا کئچیردیکدن و کیملیگی بللی ائدیلدیکدن سونرا اعتراف ائتمک اوچون آغزینی آچیب”.
او، بو آچیقلاما ادعا ائدیب: ایندی امینلیکله دئیه بیلریک کی، بو صنعتچی‌نین و اونون حیات یولداشی‌نین قاتیلی حبس ائدیلیب.
پولیس سؤزچوسو بو قاتلین شریکلری‌نین و گیزلی قالان بویوتلارین بللی ائدیلمه‌سی ایستیقامتینده دیندیرمه‌لرین داوام ائتدیگینی آچیقلایارکن بیلدیریب: تئزلیکله جینایت صحنه‌سی یئنیدن قورولاجاق و بونا گؤره آرتیق بیلگی وئریله‌جک.
۲۲ مهر ۱۴۰۲ شنبه گونو ایران مئدیاسی داریوش مهرجویی و اونون حیات یولداشی ” وحیده محمدی‌فر”ین اؤلدورولمه‌سی باره‌ده بیلگی وئردی.
ایلکین خبرین درجیندن بیر نئچه دقیقه سونرا ایسلام جمهوریتی تلویزیونونون خبر آژانسی ایران سینماسی‌نین بو تانینمیش یؤنتمنی و اونون یازیچی اولان حیات یولداشی‌نین “باشلاری‌نین کسیلدیگینی” اعلان ائتسه ده، بیر نئچه دقیقه سونرا بو خبرین بیر حیصّه‌‌‌سینی خبریندن چیخاردی.
داریوش مهرجویی و حیات یولداشی‌نین قتلی ایله باغلی پرونده‌نین آیرینتیلاری و قتل موتیولری ایله باغلی بیر چوخ بلیرسیزلیکلر وار و بیر چوخ سوسیال شبکه ایستیفاده‌چیلری، تانینمیش مدنی و حوقوقی شخصلر، حوقوق‌شوناسلار و صنعتچیلر بونو زنجیری قتللره بنزه‌دیرلر.
کئچن چارشنبه، ۲۶ مهر ۱۴۰۲-ده، بو ایکی صنعتکارین دفن مراسیمی تهرانین وحدت تالاری قارشیسیندا چوخلو سایدا اینسانین ایشتیراکی و اعتراض شوعارلاری ایله کئچیریلدی.
ایشتیراکچیلارین سؤزلرینه گؤره، بو مراسیم گوونلیک گوجلری‌نین چوخ اولدوغو بیر شرایطده کئچیریلیب و ایشتیراکچیلار اعتراض شوعارلاری سسلندیریبلر؛ بو شوعارلار آراسیندا “بو جینایتین قاتیلینه اؤلوم”، “قادین، حیات، آزادلیق” و “نه غزه، نه ده لبنان، جانیم ایرانا قوربا ” شوعارلاری اولوب.
