داخیلی ایشلر ناظیری: تویوق، یومورتا، سوت محصوللاری و یاغ باهالاشاجاق
ایران ایسلام جمهورییتی حؤکومتی‌نین داخیلی ایشلر ناظری احمد وحیدی، ترجیحی ارزین لغوی خرجلری‌نین اون و اونون محصوللاری ایله محدودلاشمایاجاغینی، تویوق، یومورتا، سود محصوللاری و یاغین دا اؤلکه‌ده آرتاجاغینی آچیقلاییب.
چارشنبه آخشامی گئجه‌سی ایسلام جمهورییتی رادیو و تلویزیونونا دانیشان وحیدی، بو محصوللارین یوکسک قیمتینی “قیمت ديیشیکلیگی” آدلاندیراراق، یارانه‌لرین هدفلنمه‌سی و ترجیحی ارز وئریلن محصوللارین ارزی‌نین آرادان قالدیریلماسی ایله بو محصوللارین قیمتی‌نین ديیشه‌جه‌یینی بیلدیریب.
داخیلی ایشلر ناظری چیخیشیندا اونو دا بیلدیریب کی، باشقا هئچ بیر محصولون باهالاشماغا حاقی و ایجازه‌سی یوخدور و هئچ کیمین قیمتی آرتیرماق اوچون ایزنی یوخدور.
وحیدی سوروجولرین گئدیش حاقینی آرتیرماق حوقوقونا مالیک اولمادیغی و بو ۴ محصولون قیمتینی آرتیرماق بهانه‌سی ایله قیمتلری آرتیرا بیلمه‌یه‌جکلری باره‌ده ده خبردارلیق ائدیب.
او بیلدیریب کی، بو ۴ محصولون قیمتینی آرتیرماق اوچون توکتیجیلره یارانه وئریله‌جک.
حؤکومتین بو محصوللارین قیمتینی آرتیرماق پلانی آرتیق قیمتلر کسکین شکیلده قالخدیغی حالدا آچیقلانیب.
دونن گئجه‌دن جمهورباشقانی ابراهیم رئیسی‌نین چیخیشیندان سونرا ایران حؤکومتی یارانه آدی آلتیندا توپلومون ۹ اوندا بیرلیک آدنلانان قروپلاری‌نین حسابینا پول کؤچورمه‌یه باشلاییب، لاکین هئچ کسه بو مبلغلری چکمه‌یه ایجازه وئریلمیر.
حؤکومت دئییر کی، یارانه‌لر ایکی آیلیقدیر و بوندان سونرا وطنداشلارا چؤرک و باشقا ماللاری آلماق اوچون الکترون کارت وئریله‌جک.
اوزمانلار ایسلام جمهورییتی یئتکیلی‌لری‌نین اوغور احتیمالی و نيتلری ایله باغلی خوش گؤرولو دئییرلر و بعضیلری بو حرکتله خالقین گئچیمی‌نین داها چوخ حؤکومتین نظارتینده اولاجاغینی دئییرلر.
#ایران_خبرلری #باهالیق
