داخیلی ایشلر ناظری ترور عملیاتیندا الی اولانلارین بعضی‌سی‌نین حبس ائدیلدیگینی آچیقلاییب ۱۵ دی ۱۴۰۲
کیرمان شهرینده باش وئرن ایکی پارتلاییشین قوربانلاری‌نین دفن مراسیمی ایله عینی واختدا بونا داخیلی و خاریجی تپکیلر داوام ائدیر و ایرانین داخیلی ایشلر ناظری کیرمانداکی ترور عملیاتی ایله باغلی چوخلو سایدا اینسانین حبس اولوندوغونو بیلدیریب.
اونون سؤزلرینه گؤره، بو حادثه ایله باغلی آپاریلان گوونلیک تعقیبیندن سونرا اونلارلا باغلانتیلی اولان شخص بللی ائدیله‌رک حبس ائدیلیب.
خسته‌خانا یئتکیلیلری‌نین بیلدیردیگینه گؤره، چارشنبه گونو قاسم سلیمانی‌نین ایل دؤنومو مراسیمی زامانی باش وئرن ایکی پارتلاییشدا ۸۹ نفر اؤلوب، اونلاردان ۱۲-سی ۱۵ یاشدان کیچیکدیر.
دونن داعش بو ایکی پارتلاییشا گؤره مسوولیتی اؤز اوزرینه گؤتوروب و بونو شیعه‌‌‌لره قارشی کامپانییاسی‌نین داوامی کیمی اعلان ائدیب.
ایران جمهورباشقانی کیرمانداکی پارتلاییشلاردا اؤلنلرین دفن مراسیمینده چیخیش ائدنلردن بیری اولوب.
جناب رئیسی داعشی “عراق و سوریه‌ده‌کی آمریکالیلارین یاراتدیغی” آدلاندیریب و دئییب: “بو گون بؤلگه و باتی آسیادا مؤوجود اولان گوونلیک حاج قاسم سلیمانی‌یه بورجلودور.”
سون بیر نئچه آیدا بیر نئچه تررور عملیاتی زامانی چوخلو سایدا ایران وطنداشی اؤلدورولوب.
اینقیلاب کئشیکچیلری کوماندانی دا بو مراسیمده دئییب: شهیدلرین قیصاصی شهید اولمادان اؤنجه آلینیب.
حسین سلامی چیخیشی‌نین باشقا بیر حیصه‌‌‌سینده بئله ادعا ائدیب: داعش آمریکا و اسرائیلین آژانی کیمی فعالیت گؤستریر.
