حمید پورولی و جلال دهقانی حبس و شاللاق جزاسینا محکوم ائدیلیبلر

 تورک مدنی فعاللار حمید پورولی و جلال دهقانی تبریز شهری‌نین ۲-جی جینایت محکمه‌‌سی‌نین ۱۰۸-جی شؤبه‌سی طرفیندن حبس و شاللاق جزاسینا محکوم ائدیلیب.

تبریز شهری‌نین ۲-جی جینایت محکمه‌‌سی‌نین ۱۰۸-جی شؤبه‌سی‌نین ثنا سیستمی واسطه‌‌‌سیله بو آذربایجانلی فعاللارا چاتدیریلدیغی قرارا اساساً، حبس جزالاری‌نین آزالدیلماسی قانونونون ۶-جی ماده‌‌سی‌نین ب و ث بندلرینه اساساً، جناب حمید پورولی و جلال دهقانی ۶-جی درجه‌‌‌لی شاللاق و حبس یئرینه ۲۲۰ میلیون ریال جریمه اؤده‌مه‌یه محکوم ائدیلیبلر. بو حؤکم حاکم مختاری سرای طرفیندن ۵ ایل مدتینه دایاندیریب.

بو آذربایجانلی فعاللار بوندان اؤنجه ۱۳ خرداد ۱۴۰۳-ده سون ساوونمالارینی آچیقلاماق اوچون آدی چکیلن شؤبه‌یه گلمیشدیلر.

بو فعاللارا قارشی ایره‌لی سورولن اتهام،‌ قانونسوز توپلاشمالارا قاتیلاراق توپلومسال دوزنی پوزماق اولاراق بیلدیریلیب کی بو ایکی فعال سؤزوگئدن اتهامی رد ائده‌رک اوز ساوونمالارینی وئریبلر.

۱۴۰۱-جی ایل ۲۵ تیرده بو آذربایجانلی تورک فعاللار داها ۵ نفرله بیرلیکده تبریزده اورمیه گؤلونون قصداً قورودولماسینا اعتراض ائدرکن ایران حؤکومتی‌نین گوونلیک گوجلری طرفیندن حبس ائدیلمیش ۲۸ شهریور گونو ده گیررو قارشیلیغیندا بو شهرین مرکزی حبس‌خاناسیندان سربست بوراخیلیبلار.

۲۵ تیر ۱۴۰۱-ده باش وئرن اعتراضلار زامانی اورمیه شهری و آذربایجانین باشقا شهرلری، او جومله‌‌‌دن تبریز، اردبیل، سولدوز، قوشاچای و… سیخ گوونلیک اورتامی‌نین شاهیدی اولموشدو کی، بو دا چوخلو تورک مدنی فعال و چئوره فعالی‌نین حبسی ایله سونوجلانمیشدی.

Iranwire