ایران‌وایره چاتان خبرلره گؤره باتی آذربایجانین قوشاچای (میاندواب) شهریندن اولان مدنی فعال حسین آزادی محکمه‌‌یه قدر ۵۰۰ میلیون تومن گیروو قارشیلیغیندا دونن ۸ آذر ۱۴۰۲-جی ایلده تبریز مرکزی حبس‌خاناسیندان سربست بوراخیلیب.

بو آنا قدر بو آذربایجانلی فعالین حبسی‌نین سببلری و اونا قارشی ایره‌لی سورولن اتهاملار باره‌ده آیرینتیلی بیلگی یوخدور.

حسین آزادی ۱ مهر ۱۴۰۲-جی ایل شنبه گونو باغمیشه‌ده سیویل مامورلار طرفیندن حبس ائدیلیب.

حسین آزادی، مرتضی نورمحمدی، مهرداد قادری و حامد یگانه پورون سربست بوراخیلماسیندان سونرا، حبسده اولان باشقا تورک مدنی فعاللار، یعنی یوروش(آیت) مهرعلی بیگلو، داود شیری، علی بابایی، ناصر رزمجو، آراز ابراهیم نژاد، جواد سودبر، امیرحسین آقایی، ابراهیم عوض پور و سیدمحمدرضا موحد تبریز اطلاعات ایداره‌سی‌نین تجرید‌خاناسیندا ساخلانیلیر و اونلارین پرونده‌سی‌نین گئدیشی باره‌ده آیرینتیلی بیلگی یوخدور.