حبیب ساسانیان -یاکاموز: فیریلداقچیلیغین سونو -خیالی دوشمن له مبارزه مئتودو
اورمو گؤلونون أن دار گونلرینده، آزربایجان میللتینین بو و باشقا سیخینتیلارا قارشی دؤزوم کاساسینین داشان چاغیندا، ایرانین تهلوکه‌سیزلیک قووه‌لری‌نین ألینده اویونجاق اولموش بیر سیرا یازیق مانقورتلار، حاقلی اعتراضلاریمیزی؛ تهرانا یوخ آنکارایا یؤنَلتمک ده یانالیرلار.
بیر حاکم سیستمین قولو اولماق و اونلارین قازانیندا قووورغا کیمی اویناماق چتین ده اولسا، اینسانلار وریندن باشا دوشونولَندی.
تصویر ده گؤردویونوز بو یازیق «آذری»لشمیش مانقورت، اصلینده آخماق دگیل. داها دوغروسو موزدلو (اجیر اولونموش) بیریسی‌دیر. فارس شئووینیزمین دینی پرینسیپلرینی رهبر توتان موزدلو، نه دئیه‌جَیینی بیلیر. چونکی اونو و اونلارا رهبرلیک ائد‌ن تشکیلات بیلیر کی، باشی بلالی ایراندا آز آدام آراشدیرماقلا مشغول دور. باشقا سؤزله دئسک، توپلومدا هر یولدان کئچن پیادانین ادعاسینی گؤزو یوممادان قبول ائدیرلر. آرتیق حاق طلب ائد‌ن هر کسی بؤلوجو یعنی تجزیه طلب و پانترک آدلاندیریب، ایشلرینی آسانلاشدیریبلار. اونون و اونون کیمیلرینین تورکلره قارشی هر هانسی یالان یازی و یا چیخیشلاری کیفایت‌دیر کی، اؤزونو آریایی ظن ائد‌ن بوتون اینسانلارین خوشونا گلسین. چونکی یوز ایلدیر کی، تورکلر آریایی ایرانینین ایشغالچیلاری، یادپلانئت‌لیلری(باشقا سیاره دن) و دوشمنلری آدلاندیریلیب و اوزه‌رینده آذری سؤزونو یارادیبلار. سانکی «آذریلر بیر مدت‌دیر دیلی دَگیشدیریلمیش آریایی لردیر و فارس آکسئنتی اولمایان (پارسی بدون لهجه) بسندگی فارسی سایاق ایگرنج لایحه‌لر له بو دیله قاییتماغا چالیشمالیدیرلار».
او و اونون نوختاسی أللرینده اولانلار بیلیرلر کی، هئچ بیر قونشو اؤلکه‌دن هئچ بیر چای اورمو گؤلونه آخمیر و سؤزده ایران ایسلام جمهوریتی مسئوللاری کسینلیک‌له سیاسی و ایدئولوژی مقصدلرله گؤلو قوروتدولار. آنجاق، یئنه ده تأکید له دئییرم؛ سؤزده ایران ایسلام جمهوریتی ایداره‌چی‌لیک اوسلوبو بئله‌دیر کی، اونلار اورمو گؤلو و بو کیمی مسئله لرده بی‌آبیرچیلیقلا اوزله‌شرکن، درحال فیریلداقچیلیقلا جورج اورول-ین ۱۹۸۴ آدلی رومان کیتابیندان یارارلاناراق، گوناهی خیالی دوشمن و یا قونشولارین اوزه‌رینه آتماقدا تکرار تجربه یه مالیکدیرلر.
بلی، او، آخماق دگیل. داها دوغروسو، او، موزدلو، یالان‌چی، فیریلداق‌چی، ساتقین و مانقورت بیریسی دیر.
حبیب ساسانیان -یاکاموز
