حامد اسماعیلیون بورلا خطابا: اینقیلاب کئشیکچیلری ایله باغلی آچیقلامالارینیزا گؤره جاواب وئره‌جکسینیز
اینقیلاب کئشیکچیلری راکئتلری‌نین اوکراینا اوچاغینا آتیلماسی زامانی قیزینی و حیات یولداشینی ایتیرن یازیچی حامد اسماعیلیون آوروپا بیرلیگی‌نین یوکسک سويه‌‌لی دیپلوماتی جوزپ بورلا اینقیلاب کئشیکچیلری ایله باغلی سؤیله‌دیگی آچیقلامالارا تویتینده رئاکسییا وئریب.
بورل بازار ائرته‌سی آوروپا ناظرلر شوراسی‌نین توپلانتیسیندا اینقیلاب کئشیکچیلری‌نین ترور قروپلاری لیستینه داخیل ائدیلمه‌سینه قارشی چیخیب و دئییب کی، آوروپا بیرلیگی طرفیندن اینقیلاب کئشیکچیلری‌نین خاریجی تررور تشکیلاتی کیمی تانیماق هئچ بیر محکمه قراری اولمادان حیاتا کئچیریله بیله‌جک بیر حرکت دئییل.
آوروپا بیرلیگی‌نین خاریجی سیاست یئتکیلیسی بیلدیریب: سیزدن خوشوم گلمیر دئیه، تروریستسن دئیه بیلمزسن.
بو آچیقلامالارا جاواب اولاراق حامد اسماعیلیون اؤز توییتر صفحه‌‌‌سینده یازیب: جناب بورل، سیز تاریخ قارشیسیندا جاواب وئره‌جکسینیز، آجاق ایندی اینقیلاب کئشیکچیلرینه قارشی صافلیغینیز سیزی مینلرله اؤلویه، حبسده اولان اینسانلارا و جینایتکارلارین گیرووندا اولان بوتون اورتا دوغویا قارشی جاواب وئرمه‌یه مجبور ائده‌جک.
آوروپا بیرلیگی طرفیندن اینقیلاب کئشیکچیلری‌نین ترور تشکیلاتی اعلان ائدیلمه‌سی ایستگی ایسلام جمهورییتینه قارشی گئنیش سیاسی و مدنی فعاللار طرفیندن گوندمه گتیریلیب.
بونونلا باغلی اؤتن هفته فرانسانین استراسبورگ شهرینده آوروپا پارلامئنتی قارشیسیندا توپلانان ۱۲ مین نفرین اساس ایستگی اینقیلاب کئشیکچیلری‌نین ترور قروپلاری لیستینه آلینماسی اولموشدو.
اینقیلاب کئشیکچیلری و اونون یاریم‌حربی قولو اولان بسیج ایندییه‌دک آوروپا بیرلیگی‌نین داغیدیجی سانکسییالاری‌نین هدفینه چئوریلیب، آنجاق بو بیرلیک بوتون اینقیلاب کئشیکچیلری قروپلاری لیستینه داخیل ائتمه‌ییب.
