جو بایدن خامنه‌ای‌نین اوفیسی و ایران جمهورباشقانی‌نین تحریم ائدیلمه‌سی حاقیندا “مهسا قانونو”نو ایمضالاییب
آمریکا جمهورباشقانی جو بایدن اوکراینا، اسرائیل و تایوانا ۹۵،۳ میلیارد دوللارلیق یاردیم پاکئتینی ایمضالاییب کی آمریکا مجلیس نوماینده‌‌لری‌نین تشبوثو ایله ایسلام جمهورییتینه قارشی تحریملری و تضییقلری آرتیرماق اوچون ایکی لایحه یعنی مهسا قانونو و گمیچیلیک قانونونو دا ایچریردی.
آمریکا سناسی‌نین هر ایکی پارتییاسی‌نین عضولری بو پاکئتی ۷۵ مثبت و ۱۷ منفی سسله تصدیقله‌ییبلر.
شنبه گونو، اردیبهشت آیی‌نین باشیندا آمریکا کنگره‌سی‌نین نوماینده‌‌لری بو پاکئتی ۳۶۰ مثبت و ۵۸ منفی سسله “۲۱-جی عصرده گوج واسطه‌‌‌سیله باریش” آدی آلتیندا اونایلاذی.
بو ۹۵ میلیارد دلارلیق قانون پاکئتی اوکراینا، اسرائیل و تایوانا گوونلیک یاردیمی گؤستریلمه‌سی اوچون یول آچیر و آیریجا ایسلام جمهورییتینه قارشی بیر سیرا تحریم پلانلارینی، او جومله‌‌‌دن “مهسا قانونو”نو قاپساییر.
مهسا قانونونون ایلکین حالی ۱۴۰۱-جی ایلده ایران خالقی‌نین ایسلام جمهورییتینه قارشی قالدیردیغی کوتلوی قیامین قانلی یاتیریلماسیندان سونرا ترتیب ائدیلمیشدیر. بو پلان ۲۰۲۳-جو ایلین شهریورینده نوماینده‌‌لر محلیسی‌نین سس چوخلوغو ایله تصدیق ائدیلیب، لاکین هله ده سنادا سسه قویولماییب.
آمریکا کنگره‌سی‌نین نوماینده‌‌لر مجلیسی‌نین باشقانی مایک جانسون ۲۹ فروردین چارشنبه گونو اوکراینا و اسرائیله خاریجی یاردیم قانون لاییحه‌‌سینه “مهسا قانونو” و “گمیجیلیک قانونو” کیمی تانینان باشقا بیر پلانی آرتیریب.
مهسا قانونو ایراندا اینسان حاقلارینی پوزدوقلارینا و اعتراضچیلاری یاتیردیقلارینا گؤره علی خامنه‌ایو ابراهیم رئیسی‌یه تحریم تطبیق ائتمک مقصدی ایله تکلیف ائدیلیب.
آیلارلا گئجیکمه‌دن سونرا آبش سناسی‌نین خاریجی ایلیشگیلر کومیته‌سی نهایت، چارشنبه آخشامی، ۲۸ فروردین گونو قانونون اورجینال حالینی‌نین تصدیقی اوچون اوزون مدت موباریزه آپاران ایرانلی آمریکالی فعاللاری غضبلندیرن وئرسیونو اونایلادی.
ایران اصیللی آمریکالی فعاللار “مهسا قانونو”نون آمریکا سناسی‌نین خاریجی ایلیشگیلر کومیته‌سی طرفیندن تصدیق ائدیلمیش وئرسیونو حدیندن آرتیق “سولانمیش” حساب ائدیبلر.
