جواد روحی‌نین اؤلومونو آراشدیرماق اوچون بیرلشمیش ملتلرین آراشدیرما کومیته‌سی‌نین دئوریه گیرمه‌سی ایسته‌نیلیب
واد روحی‌نین نوشهر زیندانیندا شوبهه‌لی اؤلومونه وئریلن تپکیلردن سونرا ایران اینسان حاقلاری تشکیلاتی بیرلشمیش ملتلر آراشدیرما کومیته‌سی طرفیندن جاواد روحی‌نین اؤلوم سببلری‌نین آراشدیریلماسینی ایسته‌ین بیر آچیقلاما یاییب.
بو تشکیلاتین مودیری محمود امیری مقدم دئییب: جواد روحی‌نین اؤلومونو حبس‌خانادا محکمه‌‌سیز قتل کیمی بیرلشمیش ملتلرین آراشدیرما کومیته‌سی آراشدیرمالیدیر.
جناب امیری مقدم دا بونو وورغولاییب کی، علی خامنه‌ای و جواد روحی‌نین حبسی، ایشگنجه و حبس ائدیلمه‌سینده رولو اولان بوتون اینسانلار و باسقیجی قوروملار بو اعتراضچی‌نین اؤلومونه گؤره مسوولیت داشیییرلار و جاواب وئرمه‌لیدیرلر.
ایران اینسان حاقلاری تشکیلاتی‌نین آچیقلاماسیندا خاطیرلادیلیب کی، جواد روحی‌دن اؤنجه ایران ایسلام جمهورییتی حبس‌خانالاریندا بیر سیرا سیاسی محبوسلار شوبهه‌لی شکیلده و بعضی حاللاردا آچیق شکیلده اؤلوب، اؤلدورولوب و یا یوخا چیخیب.
بو تشکیلات، سعید زینالی، زهرا کاظمی، ولی‌الله فیض مهدوی، زهرا بنی‌یعقوب، ابراهیم لطف‌اللهی، کاووس سیدامامی، وحید حیدری، سینا قنبری، سارو قهرمانی، بهنام محجوبی و ساسان نیک‌نفس آدلی محبوسلار دا ایران ایسلام جمهورییتی‌نین نظارت مرکزلرینده یوخا چیخمالارینا دقت چکدی.
امیدرضا میرصیافی، ستار بهشتی، علیرضا شیرمحمدعلی، بکتاش آبتین، شهریار عادلی، ابراهیم ریگی،محمد حاجی رسول‌پور، رامین فاتحی و موسی اسماعیلی ده ایران ایسلام جمهورییتی‌نین تجرید‌خانالاریندا و حبس‌خانالاریندا اولان سیاسی و ویجدان محبوسلاردیر کی ایشگنجه، بیچاقلانما، بعضی حاللاردا ایسه موعالیجه ایمکانی‌نین اولماماسی، شوبهه‌لی اؤلوملره چئوریلیب.
اوچ دفعه اعدام حؤکمو ایران عالی محکمه‌‌سی طرفیندن لغو ائدیلن، قادین، حیات، آزادلیق، عومومی اعتراضلاری‌نین محبوسلاریندان بیری جواد روحی جوما آخشامی، ۹ شهریور گونو حبس‌خانادان خسته‌خانایا کؤچورولدوکدن سونرا سحر ساعتلاریندا وفات ائدیب. بو محبوسون شوبهه‌لی اؤلومو گئنیش تپکیلر ایله موشایعت اولوندو.
