جمهورباشقانلیغی قورومونون اینترنت سایتی دئویرنه قدر قیام قروپو طرفیندن هکله‌نیب
دئویرنه قدر قیام هکر قروپو ایران جمهورباشقانلیغی قورومونون اینترنت سایتینی هکله‌دیگینی و بو سایتدان چوخلو سندلر الده ائتدیگینی آچیقلاییب.
ایرانین جمهورباشقانلیغی قورومونون اینترنت سایتی بو خبرین یایینلاندیغی واختا قدر آچیق دئییل و اونون آنا صفحه‌‌‌سینده آرانان اینترنت سایتی مؤوجود دئییل مئساژی گؤرونور.
خالقین موجاهیدلری تشکیلاتینا یاخین اولان دئویرنه قدر قیام قروپو ۱۲۰ سئروئرین بیلگیلرینه چیخیشی اولدوغونو بیلدیریب.
بو قروپون تلگرام کانالیندا بو هکلنمه‌نین سندلری درج اولونوب کی، بونلاردان بعضیلری اسدالله اسدی‌نین مبادله‌سی ایله باغلی جمهورباشقانی‌نین گیزلی مکتوبلاری، بیلیم‌یوردلاری‌نین سیخیشدیریلماسی اوچون کئچیریلن مخفی گؤروشون پروتوکوللاری، جمهورباشقانی یاردیمجیسی‌نین قوروما اکیبی‌نین ۲۵ نفری‌نین آدلاری و بیلگیلری و اؤیرنجی اعتراضلارینی یاتیرماق اوچون اؤلکه‌نین گوونلیک و اطلاعات یئتکیلیلری ایله ثارالله قرارگاهی‌نین مخفی و چوخ مخفی گؤروشلری بو سندلر آراسیندادیر.
جمهورباشقانلیغی قوروموندان الده ائدیلن سندلردن بیرینه گؤره، محمد مخبرا علی خامنه‌ای‌یه یازدیغی مکتوبدا سوریه‌نین حربی و گوونلیک ایله باغلی اولمایان سئکتورلاریندا ایرانا بورجونون ۲۰۱۹-جو ایله قدر ۱۱.۶ میلیارد دولار اولدوغونو آچیقلاییب.
بو قروپ آیریجا جمهورباشقانلیغی‌نین داخیلی تلفون نؤمره‌لرینی و گوونلیک کامئرالاریندان گؤرونتولری الده ائتدیگینی و بعضیلرینی درج ائتدیگینی بیلدیریب.
دئویرنه قدر قیام داها اؤنجه ایسلام جمهورییتی خاریجی ایشلر ناظرلیگی‌نین اینترنت سایتینی سیندیراراق اونون گیزلی بیلگیلرینی یایمیشدی.
