جلال دهقانی تبریز شهری‌نین عومومی و اینقیلاب ساوجیلیغینا چاغیریلیب
تورک مدنی فعال جلال دهقانی اونا قارشی ایره‌لی سورولن اتهامی ساوونماق اوچون تبریزین عومومی و اینقیلاب ساوجیلیغی‌نین ۱۵-جی شؤبه‌سینه چاغیریلیب.
بو مدنی فعال ۲ اسفند ۱۴۰۲-ده ایران عدليه‌‌سی‌نین الکترون سیستمی (ثنا) واسطه‌‌‌سیله آلدیغی بیلدیریشده اونا قارشی ایره‌لی سورولن اتهامی ساوونماق اوچون ۵ گون ایچینده تبریزین عومومی و اینقیلاب ساوجیلیغی‌نین ۱۵-جی شؤبه‌سینده اولمالیدیر.
جناب دهقانی یونس قلیزاده، ابراهیم آسمانی ( آذراوغلو)، وحید مختاری، مهسا پورداداش، عباس بخت‌آور، جلال انتظاری، محمد محصلی، حمید پورولی، جلال دهقانی، علیرضا بکوک، مهدی میری، حسین علیمحمدی گاوگانی، علیرضا فتح‌وند الانق، علیرضا مقصودی، مهدیه پورعباس ایله بیرلیکده ۲۵ تیر ۱۴۰۱-جی ایل شنبه گونو اورمیه گؤلونون قوروماسینا قارشی دینج اعتراضلارلا عینی واختدا تبریز شهرینده کئچیریلن اعتراض آکسییاسیندا گوونلیک گوجلری طرفیندن حبس ائدیلمیشدی.
۲۵ تیر ۱۴۰۱-جی ایل اعتراضلاری زامانی اورمیه و آذربایجانین باشقا شهرلری، او جومله‌‌‌دن تبریز، اردبیل، سولدوز، قوشاچای و… چوخلو سایدا مدنی و چئوره فعالی سیخ گوونلیک اورتامیندا گوونلیک گوجلری طرفیندن توتولموشدولار.
