جبرئیل پاکروح تبریز عومومی و اینقیلاب ساوجیلیغینا چاغیریلیب
ورک مدنی فعال و فرهاد پاکروح‌ون آتاسی جبرئیل پاکروح ۲۷ خرداد ۱۴۰۳-ده محکمه سیستمی‌نین ثنا سیستمی واسطه‌‌‌سیله بیلدیریش آلاراق ۵ گون ایچینده “یالان یایماق” اتهامینی ساوونماق اوچون تبریزین عومومی و اینقیلاب ساوجیلیغیندا اولمالیدیر.
بیر چوخ خسته‌لیکدن اذيت چکن جناب پاکروح خسته‌خانا یاتاغیندان چکدیگی و یاییملادیغی ویدئودا اؤنجه‌کی حبس سورجی و پولیس امکداشلاری‌نین تهدیدلری باره‌ده بیلگی وئریب.
جناب پاکروح ۲۵ اردیبهشت ۱۴۰۳-ده ۱۰۰ میلیون تومنلیک گیروو قارشیلیغیندا تبریز مرکزی حبس‌خاناسیندان آزاد ائدیلیب.
جبرئیل پاکروح ۲۴ اردیبهشت ۱۴۰۳-ده سحر ساعتلاریندا گوونلیک قوروملاری طرفیندن حبس ائدیلمیش و تبریز شهرینده فتا پولیسی طرفیندن سورغو-سؤال ائدیلدیکدن سونرا تبریز مرکزی حبس‌خاناسینا کؤچورولموشدور.
بو ایل اردیبهشت آییندا عدلیه‌نین الکترون بیلدیریش سیستمی واسطه‌‌‌سیله آلینان بیلدیریشه اساساً، جبراییل پاکروح تقصیرلندیریلن اتهامی ساوونماق اوچون تبریز عومومی و اینقیلاب ساوجیلیغی‌نین بیرینجی شؤبه‌سینده چیخیش ائتمه‌لی ایدی.
بوندان اؤنجه جناب پاکروح اؤزونون، قارداشی‌نین و اوغلونون دورومونو فارس دیلینده بیر ویدئودا ایضاح ائتمیشدی.
جناب پاکروح، قارداشی اسد و اوغلو فرهاد پاکروح ایله بیرلیکده تبریزده جنایت پولیسی مامورلاری طرفیندن حبس ائدیله‌رک تبریزین ۱۴-جو پولیس بؤلمه‌سینه آپاریلیب و بیر گون طبی خیدمتلردن محروم ائدیلیبلر.
IranWire
