توماج صالحی یئر اوزونده فساد اتهامیندان براعت آلیب

بسده اولان موغنی “توماج صالحی”نین وکیلی امیر رئیسیان بیلدیریب کی، ۱۴۰۱-جی ایل پرونده‌یه گؤره توماج صالحی‌یه اعدام حؤکمو چیخاران اصفهان اینقیلاب محکمه‌‌سی ایندی اونا براعت وئریب.

چارشنبه‌ آخشامی، ۲۴ مرداد گونو بو وکیل ایکس سوسیال شبکه‌سینده‌کی راپوروندا یازیب: اصفهانین اینقیلاب محکمه‌‌سی‌نین ۵-جی شؤبه‌سی توماج صالحی‌یه داها اؤنجه اعدام حؤکمو چیخاریلان یئر اوزونده فساد اتهامی ایله باغلی ۱۴۰۱-جی پرونده اوزره براعت حؤکمو چیخاریب. باشقا اتهاملارا گلینجه، او، اتهام آکتی‌نین ایجرعاتی‌نین دایاندیریلماسی باره‌ده قرار چیخاریب و بیلگی‌سایار اوزریندن یالان یایماق و دوزنی پوزماق ایله باغلی ایکی اتهامی ۲-جی جینایت محکمه‌‌سینه گؤندریب.

۲۱ مرداد ۱۴۰۳-جو ایل بازار گونو ده توماجین باشقا وکیلی حوقوقچو مصطفی نیلی “ایکس” سوسیال شبکه‌سینده یازمیشدی: اصفهان اینقیلاب محکمه‌‌سی‌نین بیرینجی شؤبه‌سی طرفیندن عالی محکمه‌‌ده وئریلن قرارین پوزولماسیندان سونرا توماج صالحی‌نین ۱۴۰۱-جی ایل اعتراض پرونده‌سی‌نین اوتورومو اینقیلاب محکمه‌‌سی‌نین ۵-جی شؤبه‌سینده پارالئل شؤبه اولاراق کئچیریلیب.

اصفهان اینقیلاب محکمه‌‌سی‌نین بیرینجی شؤبه‌سی بو ایل ۳۰ فروردین گونو اعتراضچی موغنینی “ال بیر اولماق و توپلاشماق و سلاحلی عصیان‌دا یاردیمجی اولماق” اتهامی ایله موحاکیمه‌‌ ائدیب و اونا اعدام حؤکمو چیخاریب. بو حؤکمون وئریلمه‌سی گئنیش داخیلی و اولوسلارآراسی اعتراضلا موشایعت اولوندو. نهایت، بو ایلین تیر آییندا ایسلام جمهورییتی‌نین عالی محکمه‌‌سی‌نین ۳۹ سایلی شؤبه‌سینده بو حؤکم لغو ائدیلیب.