توماج صالحی زنگ ائتمک حوقوقوندان محروم ائدیلیب
حبس اولوناراق اعدام جزاسینا محکوم ائدیلن اعتراضچی رپر توماج صالحی ، ۸ اردیبهشت ۱۴۰۳-دن اعتباراً تلفون دانیشیغی حوقوقوندان محروم ائدیلیب.
جناب صالحی‌نین وکیلی امیر رئیسیان بو خبری آچیقلایارکن ایکس کانالینداکی قوللانیجی حسابیندا یازیب کی، مووکیلی، دونن آتاسی ایله گؤروشده بونون سببی‌نین سانال اورتامدا اولان معلوماتلار اولدوغونو بیلدیریب.
توماج صالحی‌نین وکیلی چارشنبه گونو، ۵ اردیبهشتده “شرق” کانالینا موصاحیبه‌سینده مووکّیلی‌نین ۱۴۰۱-جی ایل ده کی پرونده‌سی اوزره ایره‌لی سورولن اتهاملارا گؤره اعدام جزاسینا محکوم ائدیلدیگینی بیلدیریب.
امیر رئیسیان آرتیریب کی، اصفهان اینقیلاب محکمه‌‌سی‌نین بیرینجی شؤبه‌سی “یئر اوزونده فساد” اتهامی‌نین “میقیاسی‌نین یوخلانیلماسی”نا دقت چکیب و اعدام حؤکمو چیخاریب، عینی شؤبه داها اؤنجه بو اتهامین احاطه دایره‌سینی یوخلایا بیلمه‌میشدی.
بو اعتراضچی موغنی‌نین اعدام حؤکمونون اعلان ائدیلمه‌سی گلوبال اعتراضلارا سبب اولوب.
حبسده اولان رپر توماج صالحی ۲۷ آبان ۱۴۰۲-ده “۲۵۲ گون تک‌آداملیق حوجره‌‌ده حبسده قالدیقدان سونرا” گیروو قارشیلیغیندا سربست بوراخیلدی، آنجاق ۱۲ گون سونرا و حبس‌خانادا ایشگنجه‌لره معروض قالدیغی باره‌ده ویدئو یاییملاندیقدان سونرا “دؤیوله‌رک” تکراردان حبس اولوندو.
عینی زاماندا، “تلگرام” مئساژلاشما شبکه‌سینده توماج صالحی‌نین وکیلی امیر رئیسیان و وکیل مصطفی نیلی‌نین ایستیفاده‌چی حسابلاری سیبر هوجوما معروض قالیب. بعضی فرضيه‌‌لر گؤستریر کی، بو سیبرهوجوم توماج صالحی‌نین پرونده‌سی ایله باغلی بیلگی آختارماق ایله ایلگیسی واردیر.
