تورک مدنی فعال فاضل وزیری شیراز اینقیلاب محکمه‌‌سینه چاغیریلیب
قاشقای تورکلریندن اولان مدنی فعال و حوقوقچو فاضل وزیری، عدليه‌‌‌نین ثنا سیستمی واسطه‌‌‌سیله آلدیغی بیلدیریشه گؤره، بئش گون ایچینده شیراز عومومی و اینقیلاب ساوجیلیغی‌نین ۱۴-جو شؤبه‌سینده اولاراق اونا قارشی ایره‌لی سورولن اتهاملاری ساوونمالیدیر.
بو تورک فعالین اتهاملاری “رژیمه موخالیف قروپلارلا دستک و امکداشلیق یولو ایله اؤلکه‌نین داخیلی و خاریجی گوونلیگینه قارشی ال بیر اولماق” و “قامو اویونو چاشدیرماق و یالان یایماق” آدلانیر.
تورک حوقوقچو و وکیل سینا یوسفی توییتر صفحه‌‌‌سینده یازیب: بو یاخینلاردا حبس اولونان و بیر مدت سونرا گیروو قارشیلیغیندا سربست بوراخیلان صدرای قاشقایی یورد شهری‌نین تورک فعاللاریندان اولان حوقوق معزونو فاضل وزیری شیراز ساوجیلیغی‌نین ۱۴-جو شؤبه‌سی‌نین موستنطیقی سیدمحمد خسروانی‌نین ایمضاسی ایله اتهاملارینی ساوونماق اوچون بیلدیریش آلیب.
فاضل وزیری ۱۷ اردیبهشت ۱۴۰۳-ده شیرازدا حبس ائدیلمیش و شیراز اطلاعاتیندا بئش گونلوک سورغو-سؤال و ایشگنجه‌لردن سونرا شیرازیم عادل آباد حبس‌خاناسینا کؤچورولموشدور. بو تورک فعال ۳۴ گونلوک حبس و بلیرسیز دورومدان سونرا نهایت کی، شیرازین عادل آباد حبس‌خاناسیندان بیر میلیارد تومن گیروو قارشیلیغندا آزاد ائدیلیب.
قاشقای یورددا تورک فعاللارین گوونلیک اتهامی ایله حبس ائدیلمه‌سی ایلک دفعه دئییل. سون بیر نئچه آیدا “قاشقای تورک” فعاللارینا و اونلارین عائله‌‌‌لرینه قارشی تضییق و تهدید دالغاسی قئیده آلینیب.
Iranwire
