قادین، اؤزللیکله، تورپاغی بول محصوللو اولان آذربایجان قادینی ذاتا و فطرتا طبیعتله باغلیلیغی وار. چئوره‌نی، داغی، داشی، چایی، گؤلو، دنیزی یاشاییشیلا قوروماغی و ایکی طرفلی استفاده‌نی هر زامان باشاریبلار.
بونلارلا یاناشی دنیزلرین و چایلارین قادین اوچون اؤزل بیر یئری و دئیری وار. سویا، تورپاغا آند ایچر و دیل ازبری سو اولار.
اورمو گؤلو آذربایجانلی‌لارا تکجه بیر شور گؤل دئییل. عین حالدا سئویملی دنیز، هویت و کیملیک، تاریخ، یاشام سیمبولو و یاشام قایناغی‌دیر.
اوزمان‌لارین دئدیکلرینه گؤره اورمو گؤلو بیر طبیعی و اکولولوژیک سبب لر اوزوندن یوخ، بیلرک و سیستماتیک سالدیری و دوشمن چیلیکله قصدا تدریجا قورودولور.بو فاجعه تکجه آذربایجانا اؤزل دئییل، بلکه فرامنطقه ای بیر مسئله دیر. بو فلاکتین قاباغینی آلماق اولار. بونو مسئول‌لار دا بیلیر. آنجاق فاجعه نین تبعاتی و قورخونج‌نتیجه لرینی بیلرک، ندنسه هئچ بیر چاره قیلماماقلاری سوال یئریدیر.
آذربایجان تورک قادینلاری، اورکلری یاناراق و بو ایشین حساسیتینی بیلرک، اؤزلرینی بو توپلومون سوروملو اویه‌سی و عضوی بیلیب، بوتون باسقیلارا و امنیتی ریسکلره و تهدیدلره رغمن، اعتراض نمایش لری ایله یاتان مسئول‌لاری اویاتماق قرارینا گلیبلر.
آنا طبیعتین جان وئرن اورمو گؤلونو قورتارماق اوچون، وطنیمیزین بوتون قادینلار، ائرککلر، گنج و یاشلی لارینا احتیاجیمیز وار.
لطفا  ال- اله چیین‌چیینه قالخیب، قادینلارا دستک اولوب، اورمو گؤلونو اؤلومدن قورتاراق.

بیز تورک قادینلار اوجاغی، تبریز قادینلاری‌نین بو اعتراضینی دستکله‌ییب و بوتون طبیعت سئونلر، اینسان حاقلاری آکتیویستلر، آذربایجان و ایرانین باشقا فعال‌لاریندان بو اعتراضلاردان حمایت ائتمکلرینی و اورمو گؤلونون سسی اولماقلارینی ایسته ییریک.