توحید امیرامینی اوین حبس‌خاناسیندان سربست بوراخیلیب
اوین حبس‌خاناسی‌نین ۴-جو بندینده حبسده اولان مدنی فعالی توحید امیر امینی ۴ ایل حبسه دؤزدوکدن سونرا نهایت دونن، چارشنبه گونو، ۱۹ بهمن ۱۴۰۱-جی ایلده اوین حبس‌خاناسیندان سربست بوراخیلیب.
توحید امیرامینی ایله بیرلیکده اوین حبس‌خاناسیندان چیخان موعلیملر بیرلیگی‌نین فعاللاریندان اولان محمد حبیبی‌نین حیات یولداشی خدیجه پاک‌ضمیر توییت یازاراق بو ایکی ویجدان فعالین آزادلیغا بوراخیلدیغینی آچیقلاییب.
بو واختا کیمی، ۵ ایللیک حبس جزاسینی چکن جناب امیرامینی‌نین آزادلیغا بوراخیلماسی‌نین آیرینتیلاری بللی دئییل، لاکین، بو مدنی فعالین آزادلیغا بوراخیلماسی سون دؤنمده چیخان عفو ایله باغلی اولا بیلر.
بو آذربایجانلی فعال ۱ اسفند ۱۳۹۷-جی ایلده کیانوش اصلانی ایله بیرلیکده تهرانین اینقیلاب مئیدانیندا “دونیا آنا دیلی گونو” موناسیبتیله بروشور یایدیغی اوچون حبس اولونوب.
امیرامینی و اصلانی تهرانین اینقیلاب محکمه‌‌سی‌نین ۲۶ سایلی شؤبه‌سینده حاکم ایمان افشاری‌نین باشقانلیغی ایله “ملی گوونلیگی پوزماق مقصدی ایله توپلاشماق و ال‌بیر اولماق و رژیمه قارشی تبلیغات آپارماق” ایله اتهام ائدیله‌رک توپلام ۹ ایل حبسه محکوم ائدیلمیشدی. بو حؤکم کئچن ایل بهمن آییندا حاکم زرگرین باشقانلیغی ایله تهران محکمه‌‌سی‌نین ۳۶-جی شؤبه‌سینده ۷ ایل آلتی آیا ائندیریلدی.
توحید امیرامینی، اؤنجه‌لر ده فعالتینه گؤره حبس ائدیلمیش و موحاکیمه اولونموشدور. بیر حالدا، تانینمیش آذربایجانلی سیاسی محبوس عباس لسانی‌نین، توتولماسینا اعتراض ائتدیگی اوچون آلتی آی حبس و شاللاق جزاسینا محکوم ائدیلمیشدیر.
