تهران املاکچیلار بیرلیگی‌نین باشقان یاردیمجیسی: کیرایه‌‌‌لر یوزده ۵۰-دن چوخ آرتیب
تهران ایالتی‌نین املاکچیلار بیرلیگی‌نین باشقان یاردیمجیسی بیلدیریب کی، ائو صاحبلری یوزده ۲۵ آرتیملا ائولرینی ایجاره‌یه وئرمک ایستمیرلر و پایتاختین بعضی بؤلگه‌لرینده طلب کیرایه یوزده ۵۰ آرتیب.
داوود بیگی‌نژادین سؤزلرینه گؤره، قانونا گؤره، املاکچیلار یوزده ۲۵-دن یوخاری ایجاره آنلاشمالاری باغلامامالیدیرلار و بو آنلاشمالا “گیزلی” باغلانیر.
بازار ائرته‌سی، ۱۵ مرداد گونو بیگی‌نژاد ایلنایا بیلدیریب کی، نؤقطه‌‌‌دن-نؤقطه تورم سويه‌‌سی یوزده ۴۷ و ایللیک تورم یوزده ۳۷ اولدوغو حالدا، ائو صاحبلری کیرایه‌نی یوزده ۲۵ راضی دئییللر و ایندی بعضی بؤلگه‌لرده کیرایه یوزده ۵۰-دن چوخ آرتیب.
حاضردا ائو کیرایه‌‌‌سی ایرانلیلارین ان اؤنملی اقتصادی پروبلئملریندن بیرینه چئوریلیب و هر گون چوخلو سایدا سانال اورتام ایستیفاده‌چیسی طرفیندن یاییملانان مئساژلارین بیر حیصه‌‌‌سی بو ساحه‌‌‌ده کیرایه حاقی، یوکسک قیمتلر و تورم قونوسونا حصر اولونوب.
بیگی‌نژادین سؤزلرینه گؤره، بازاردا ایجاره‌یه طلب تکلیفدن چوخدور و بو، کیرایه حاقی‌نین آرتماسی‌نین سببلریندن بیریدیر.
خرداد آییندا تهران شهری‌نین یئنیلنمه‌سی تشکیلاتی‌نین باش مودیر مهدی هدایت تهراندا منزیل طلبی ایله طلب آراسینداکی اویغونسوزلوغا ایشاره ائده‌رک، تهراندا یوزده ۴۲ عائله‌لرین منزیل یوخسوللوق حدی‌نین آلتیندا اولدوغونو بیلدیریب.
دنیای اقتصاد رسمی بیلگیلره ایستیناد ائده‌رک یازیب کی، ۱۴۰۲-جی ایلین اسفند آییندا باشا چاتان بیر ایللیک مدتده تهراندا ائو کیرایه‌‌‌سی یوزده ۵۲، ایرانین باشقا شهرلرینده ایسه یوزده ۳۹.۶ آرتیب.
