تبریزده احمدین ناغیلی آدلی کوکلا تاماشاسی نوماییش ائتدیریله‌جک
«احمدین ناغیلی» آدلی کوکلا تاماشاسی خردادین ۱۸-جی گونوندن اعتباراً تبریزین ناجی کینوتئاتریندا نوماییش ائتدیریله‌جک. تاماشانین رئژیسسورو حجت زینالی بو تاماشانین آذربایجان خالق کولتوروندن ایلهام آلاراق یازیلدیغینی و ۳ فرقلی کلاسیک ناغیلین بیرلشمه‌سیندن عمله گلیدیگینی دئییب. او هم ده اصلینده بو ناغیلی ننه‌سیندن ائشیتدیگینی و مدرن اصول‌لارلا صحنه‌لشدیره‌جه‌یینی بیلدیریب.
۱۸ خرداد تاریخیندن اعتباراً هر آخشام تبریز واختی ایله ساعت ۱۹:۰۰-دا نوماییش ائتدیریله‌جک اولان بو تاماشا «تنبل احمد»(آذربایجانین موختلیف یئرلرینده فرقلی آدلارلا تانینیر. او جمله‌دن قورخاق احمد و تنبل حسن و سایره)، «کیم هامیدان گوجلو» و «تولکونون قویروغو» آدلی کلاسیک ناغیل‌لارین جمعلشدیگی تاماشادیر.
«احمدین ناغیلی»-نی اوچ شخص صحنه‌لشدیره‌جک: حئکایه‌چی، کامانچا چالان و کوک‌لالاری اوینادان شخص. چوخ سایدا کوکلا ایله ناغیلی جانلاندیران شخص رئژیسسورون اؤزو اولاجاق. تهران اونیوئرسیته‌سیندن کوکلا تئاتری ایختیصاصیندان ماذون اولان رئژیسسور زینالی دئییب کی بیر چوخوموزون بؤیوک آنالاریمیزدان ائشیتدیگی بو ناغیل‌لارین یئنی نسیلین ده ائشیتمه‌سینی هدفله‌ییب. خصوصیله اؤز آنا دیلینده، یعنی آذربایجان تورکجه‌سینده تاماشالاری نوماییش ائتدیرمک ایسته‌دیگینی بیلدیرن رئژیسسور کوکلا تئاتری مؤوضوعسوندا تورکجه هر هانسی بیر قایناق تاپا بیلمه‌دیگینی و فارسجا اثرلردن ایستیفاده ائتدیگینی دئییب.
احمدین ناغیلی ۴ یاش و اوندان آرتیق یاشی اولان اوشاق‌لار اوچون نظرده توتولوب و ۴ تیر تاریخینه‌دک هر آخشام ۴۵ دقیقه عرضینده تبریزده ناجی کینوتئاتریندا نوماییش ائتدیریله‌جک.
