تئاتر آکتورو مهربان کشاورزی اوین حبس‌خاناسینا گؤندریلدی
مدنی فعال و تئاتر آکتورو «مهربان کشاورزی» جزاسینی چکمک اوچون ائوین حبس‌خاناسینا گئتدی. او اوچ آی بیر گون تعزیری حبس جزاسینا محکوم ائدیلیب.
مهربان کشاورزی‌یه یاخین بیر منبع ایران‌وایره دئدی: «مهربان ائوین محکمه‌‌سی‌نین حؤکمونو ایجرا ائتمک اوچون دونن اؤزونو بو حبس‌خانایا تانیتدی و ایداری آددیملاری بیتیردیکدن سونرا چارشنبه گونو اوین حبس‌خاناسینا گؤندریلدی.»
مهربان کشاورزی ، ۲۶ فروردین ۱۳۹۶-جی ایل تاریخینده، تهران اینقیلاب محکمه‌‌سی‌نین ۲۸-جی شؤبه‌سی طرفیندن «رژیمه قارشی تبلیغات»، اتهامی ایله ۱ ایل تعزیری حبسه محکوم ائدیلمیشدی.
بو جزا کئچن ایلین دی آیینین ۱۴ ده تهران تمییز محکمه‌‌سی‌نین ۵۴-جو شؤبه‌سینده اوچ آی بیر گونلوک حبس جزاسینا ائندیریلدی.
کشاورزی ، ۱۳۹۴-جی ایلین شهریورینده اینقیلاب کئشیکچیلرینین اطلاعات ایداره‌سی‌نین مامورلاری طرفیندن توتوقلاناراق اوین حبس‌خاناسی‌نین «۲ الف»، بندینه کؤچورولدو. همین ایلین مهر آییندا مووقتی اولاراق گیروو موقابیلینده سربست بوراخیلدی.
مهربان کشاورزی علامه طبا‌طبایی بیلیم‌یوردونون سوسیولوژی مزونو و تئاتر آکتورودور. او سون رولونو بو ایلین تیر آیینین سونو و مرداد آیینین اولینده فرزاد امینی‌نین یؤنتدیگی «روحون اون بیر یاراسی»، آدلی تئاتردا اوینامیشدیر.
