بیز واریق وارسا وطن وارایسه دوغما دیلیمیز !

بیز واریق وارسا وطن وارایسه دوغما دیلیمیز
اؤیره نیب بیلمه لیدیراؤز دیلینی تورک ائلیمیز
آنا تک جاندان عزیزدیر آنا تورپاق آنا دیل
حورمتین ساخلا یاشارکن آنالار قدرینی بیل
وطنین کیملیییدیر وارلیغینین داش تملی
کیملییین بایراغیدیر هر بالانین دوغما دیلی
آنا دیلدیر بزه ین دویغولارین اویلاغینی
سوسله ین آرزیلاری سئوگی سئوینجین باغینی
بولبول اؤز دوغما دیلیله گوله سویلر سؤزونو
هر گول اؤز رایحه سیله تانیدار اؤز اؤزونو
آنا دیلدیر داشییان لایلالارین جان دادینی
آنا دیلدیر یاشادان ائولادینین اؤز آدینی
آنا دیلدیر ائلینین تاریخی آیدین تانیغی
یوردونون اؤلکه سینین آیناسی سؤنمز چراغی
آنا دیلده آنانین سئوگیسی عطری دادی وار
آنا دیلده وطنین شانلی شرفلی آدی وار.

کیملیییندن دوشن اوزاق

میلیون میلیون ائلیم یازیق

سؤزو یاساق یولو دوزاق

باغلی قالان دیلیم یازیق

بزه نیبدیر اوچوروملار

بیزی بیزدن آلماق اوچون

هر گون یئنی بیر فرتانا

اورتالیغا سالماق اوچون

یاد قازانی دولو قاینیر

دنی بیزدن کؤزو بیزدن

ائویمیزی اودا چکن

آلیشیقلار اؤزوموزدن

یولاریمیز ائنیش یوخوش

دؤنگه بوجاق بوروق بوروق

یادین دیلی بوینوموزدا

اسگی پاسلی بویوندوروق

عیسا کیمی داشییریق

خاچیمیزی اؤزوموزله

گرچک لره اینانمیریق

گؤره گؤره گؤزوموزله

قورتولوشو قازانماساق

اسگی حامام اسگی تاسدیر

یاد ائوینده چال اویناماق

بیزیم ائوده هر گون یاسدیر

یئنه اوخوللار آچیلیر
یادلاشماغی اؤره تمه یه
یوردوموزون بالالاری
اؤزگه دیلده آغزین ایه

یئنه باشلیر گؤز اؤنونده
کیملیگیمیز تالان اولسون
فضولونون نسیمی نین
چیچک دولو باغی سولسون

دوغما دادلی یوخوموزو
یاد ایسته ییر خواب ائیله سین
آینا بولاغلارین سویون
بولاندیریب آب ائیله سین

باجی قارداش اونودولسون
عزیز آنام مادر اولسون
حیدر بابا قان آغلاسین
شهریارین گؤزو دولسون

خزان چاغی باغلار کیمی
وارلیغیمیز یارپاق توکور
اؤز دیلیمیز سوسدورولور
اؤزگه دیلی قولاق سؤکور

یئنه اوخوللار آچیلیر
وارلیغیمیز دوستاق اولا
تالان اولان یوردوموزدا
آنا دیلیم یاساق اولا

درسه گئدن بیر اوشاق “صابیرسایاغی”

درسه گئدن بیر اوشاق
مکتبه گئتدی قوچاق
هویوخدو بیردن بیره
تب دوشدو گویدن یئره
نه دئدیلر بیلمه دی
بیلنمه دی آب نه دی
قریلدی قول قانادی
ذوقو شوقو قالمادی
بیردن اوشاق نئیله دی
اوجا سسله سؤیله دی
سن نه یامانسان آ یاد
دیلیمی آلانسان آ یاد
سنین دیلین دوزاق دیر
دیلیمی کسن پیچاق دیر
آیدین اولوبدور ائلیم
منیمسه نیر تورک دیلیم
آنا دیلیم عزیز دیر
اینجی دولو دنیز دیر
آنا دیلیم جانیم دیر
منلییم دیر شانیم دیر
فارسی فارسا گرک دیر
نان دئمه رم چورک دیر
آذربایجان ائلیم دیر
تورکو آنا دیلیم دیر

آب سو دئییل
بولاغلاری بولاندیران
یاد تیکانین کوللاندیران
گولوموزو سولدوراندیر
باغیمیزی قوروداندیر
ترس آخیشی ائویمیزی ییخان سئل دیر
یئرسیز سسی کوفولدایان قارا یئل دیر

اوخوللاردا ” نان ” دئیلن
جننت آذربایجان یازلیغیندان
پیشیریلن چورک دئیل
قارا داغین تاخیلیندان
برکتلی اکمک دئیل
دردیمیزی درینله دن
بیزلیگی بیزده اریدن
تولکو یادین یالادیغی یئییلمزدیر
او نان بیزه گوج وئرمزدیر

اوخوللاردا ” خاک ” دئیلن
دوغما آنا تورپاق دئیل
مین ایللرین قالادیغی
یانار قوتسال اوجاق دئییل
اؤزگه لیگین یاسدیغی دیر
یادین یادلیغین سسی دیر
کوله لیگین سیمگه سیدیر

بو اوخوللار بو یووالار
بیزدن دئیل
بیزیم دئیل
واراق واراق قوندارمادیر
یازی یازی اویدورمادیر
یالانلارلا دولدورمادیر
کوکوموزدن اوزاقلاشماق اوداغیدیر
یادلاشماغین دوزاغیدیر
خاک اکیلمز ، نان یئیلمز ، آب ایچیلمز
آنا دیلیم دئییشیلمز

آب ایچیلمز
آب سووارماز
آریندیرماز باریندیرماز
آب سو دئییل
بولاغلاری بولاندیران
یاد تیکانین کوللاندیران
گولوموزو سولدوراندیر
باغیمیزی قوروداندیر
ترس آخیشی ائویمیزی یئخان سئل دیر
یئرسیز سسی کوفولدایان قارا یئل دیر

اوخوللاردا ” نان ” دئییلن
جننت موغان یازلیغیندان
بیشیریلن چورک دئییل
قارا داغین تاخیلیندان
برکتلی اکمک دئییل
دردیمیزی درینله دن
بیزلیگی بیزده اریدن
تولکو یادین یالادیغی یئییلمزدیر
او نان بیزه گوج وئرمزدیر

اوخوللاردا ” خاک ” دئییلن
دوغما آنا تورپاق دئییل
مین ایللرین قالادیغی
یانار قوتسال اوجاق دئییل
اؤزگه لیگین یاسدیغی دیر
یادین یادلیغین سسی دیر
کوله لیگین سیمگه سیدیر

بو اوخوللار بو یووالار
بیزدن دئییل
بیزیم دئییل
وراق وراق قوندارمادیر
یازی یازی اویدورمادیر
یالانلارلا دولدورمادیر
کوکوموزدن اوزاقلاشماق اوداغیدیر
یادلاشماغین دوزاغیدیر

سایقیلار ، سئوگیلر
اسماعیل