بیر مراسیمده نورمالاری پوزدوغونا گؤره قادین حکیم ” فاطمه رجایی‌راد” ین طب پروانه‌سی لغو ائدیلیب
مازندران طب علملری بیلیم‌یوردو رئیسی‌نین وئردیگی آچیقلامایا گؤره، بیر حکیمین طب پروانه‌سی «ادبسیز و ایسلام قایدالاریندان اوزاق داورانیشا»، گؤره لغو ائدیلیب.
جوما آخشامی، ۴ مهر گونو ایران خبر آژانسلاری آمول شهرینده سئچکین حکیملرین تلطیف ائدیلمه‌سی مراسیمینده حکیملردن بیری‌نین تشکور بلگه‌سی آلارکن “نرملاری پوزماق” حرکتینه یول وئردیگی باره‌ده بیلگی یاییب.
مازندران طب علملری بیلیم‌یوردونون رئیسی فرهاد غلامی بو حکیمی “قانونو پوزان” آدلاندیریب و اونون طب پروانه‌سی‌نین دایاندیریلماسی‌نین طب سیستمی‌نین گونده‌مینده اولدوغونو بیلدیریب. غلامی‌نین سؤزلرینه گؤره، آمول‌دا بو سئچکین حکیمین طب پروانه‌سی‌نین دایاندیریلماسی ایله یاناشی، بو کونفرانسدا ایشتیراک ائدن ایداره‌چیلر ده اینضیباطی و اینتیظام پوزونتولاری اوزره ایداری پوزونتولار هیاتینه تقدیم ائدیلیب.
اوز جراحیسی اوزره اوزمان اولان دوکتور فاطمه رجایی‌رادین سئچکین حکیم کیمی تشکور بلگه‌سی آلارکن حجابسیز اولماسی فارس و مشرق کیمی بعضی حؤکومت سایتلاری‌نین اعتراضینا سبب اولوب. آمول شهرینده حکیملر گونو موناسیبتیله کئچیریلن مراسیمده بو خانیم حکیمه قارشیلیق وئریلمه‌سینی طلب ائتدیلر.
گؤرونور، ارزشی ادی ایله تانینان آشیری قروپلارین مئدیادا موباحیثه‌سی و محکمه سیستمینه تضییقلردن سونرا بو حکیمین طب پروانه‌سی لغو ائدیلیب.
بوندان اؤنجه مجبوری حجابا قارشی چیخان موهندیس زینب کاظمی اؤتن قیش تهران ایالتی‌نین موهندیسلیک سیستمی تشکیلاتی‌نین عومومی ایجلاسیندا “عومومی عفته ضرر وورماق” اتهامی ایله باش اؤرتوسونو چیخاردیقدان سونرا ۷۴ شاللاق جزاسینا محکوم ائدیلمیشدی.
