بیر قادین یولوخوجو خسته‌لیک اولاراق تانیملانان حجابسیزلیغا گؤره ۲ آی حبسه محکوم ائدیلیب
تهران محکمه‌‌سی بیر قادین وطنداشی مجبوری حجاب تاخماقدان ایمتینا ائتمه‌سینی “یولوخوجو روحی خسته‌لیک” کیمی تانیملاییب و اونو حبس و سوسیال محرومیتلره محکوم ائدیب.
بازار ائرته‌سی، ۱۹ تیر گونو سوسیال شبکه‌لرده یاییلان بو حؤکمون گؤرونتوسونه گؤره، تهراندا یاشایان بو قادینا مجبوری حجاب تاخمادیغی اوچون ایکی آیلیق حبس جزاسی و ایکی هفته‌دن بیر ساغلاملیق راپورونون آلینماسی و ایکی ایل اؤلکه‌دن چیخیش جزاسی وئریلیب.
تهرانین ۲-جی جزا محکمه‌‌سی‌نین حاکمی علی امیدی‌نین وئردیگی بو حؤکمون متنینده حجابسیزلیق جینسی اخلاقسیزلیغین یاییلماسینا سبب اولان یولوخوجو روحی خسته‌لیک کیمی تانیملانیر و بو سببدن بو پرونده اوزره تقصیرلندیریلن شخص اک اولاراق ایکی آی حبسدن باشقا آلتی آی دا خسته‌لیگی موعالیجه ائتمک اوچون مصلحت آلماغا محکوم ائدیلیب.
بو حؤکومون باشقا حیصه‌‌‌سینده خاریجه سفرلر زامانی آنتی-ایران داورانیشی‌نین مومکونلویو بو قادینین اؤلکه‌دن چیخیشینا قاداغا قویولماسی‌نین سببلریندن بیری کیمی گؤستریلیر.
رئیسی حؤکومتی‌نین مجلیسه گؤندردیگی عیفت و حجاب مدنيتی‌نین دستکلنمه‌سی آدلی قانون لاییحه‌‌سی‌نین هله ده مجبوری قانونا مینمه‌دیگی بیر شرایطده مجبوری حجابا قارشی چیخماق جینایتینه گؤره قادینلارا حبس جزاسی و سوسیال محرومیتلر وئریلیر.
بونونلا باغلی مجبوری حجابا تابع اولمایان قادینلارا قارشی بیر چوخ پول و باشقا جزالار وئریلیب.
بو گون ایسلام جمهورییتی‌نین محکمه اورقانی‌نین رئیسی حجاب و عیفت قانون لاییحه‌‌سی حاقیندا دانیشیب و دئییب کی، بونونلا باغلی مجلیسین قانون لاییحه‌‌سینی گؤزله‌مه‌مه‌لی‌ییک، چونکی بو، واخت آپارا بیلر.
اؤلکه‌نین تفتیش تشکیلاتی‌نین رئیسی اونو دا آچیقلاییب کی، یئتکیلیلر “حجابسیز” مسئله ایله باغلی محکمه اورقانی‌نین امرینه احتیاج دویمور و بیلا واسیطه اؤز گؤرولرینی یئرینه یئتیره بیلرلر.
