بیر اؤیرنجییه آبان اعتراضلارینا قاتیلدیغی اوچون ۵ ایل حبس جزاسی وئریلدی
تهران بیلیم‌یوردونون آنتروپولوژی اؤیرنجیسی و ۱۳۹۸-جی ایل آبان اعتراض آکسییالاری‌نین محبوسلاریندان بیری اولان کامیار ذوقی، تهران اینقیلاب محکمه‌‌سی طرفیندن دؤرد ایل تعلیقی و بیر ایل تعزیری حبس جزاسینا محکوم ائدیلدی.
هرانا سایتی‌نین وئردیگی بیلگیلره گؤره، کامیار ذوقی، اینقیلاب محکمه‌‌سی‌نین ۱۵ سایلی شؤبه‌سی‌نین ایلک قرارینا اساساً “اؤلکه‌نین گوونلیگینه قارشی حرکت ائتمک اوچون گیزلی آنلاشما و توپلاشما” اتهامی ایله توپلام بئش ایل حبس جزاسینا محکوم ائدیلدی.
تهران بیلیم‌یوردونون بو اؤیرنجیسی ۲۷ آبان ۱۳۹۸ بازار ائرته‌سی گونو، آبان آییندا کئچیریلن عوموم‌میللی اعتراض آکسییالاری زامانی حبس اولوندو و ۱۶ آذر ۱۳۹۸-جی ایلده اوین حبس‌خاناسیندان گئچیجی اولاراق گیروو قارشیلیغیندا سربست بوراخیلدی.
مدنی فعاللار و آبان اعتراضلارینا قاتیلانلارا آغیر جزالارین وئریلمه‌سی ائله بیر واخت باش وئریر کی، ایسلام جمهوريتی‌نین محکمه حاکیميتی ایسلامی مرحمت سببییله گوونلیک حؤکملولری‌نین عفوینی گئنیش پروپاگاندا ایله اعلان ائتمیشدی.
۲۲ آبان جوما آخشامی، تهران بیلیم‌یوردونون باشقا بیر اؤیرنجیسی مرجان اسحاقی، ۱۳۹۸ آبان اعتراض آکسییالارینا قاتیلدیغی اوچون بئش ایل حبس جزاسینا محکوم ائدیلدیگینی بیلدیردی.
بو آغیر حؤکملر ۹۸-جی ایل آبان اعتراضلاری‌نین باشلانماسی‌نین ایلدؤنومونده اؤیرنجی فعاللارا وئریلدی.
میثیل‌‍‌‌سیز سایدا اینسانین ایسلام جمهوريتی حؤکومتینه قارشی کوچه‌لره چیخماسی ایله موشایعت اولونان اعتراض آکسییالاری زامانی چوخ سایدا اعتراضچی اؤلدورولدو و بیر نئچه مین نفر توتولاراق حبس‌خانایا گؤندریلدی.
رویترز، آبان اعتراضلاریندا ۱۵۰۰ نفرین اؤلدویونو خبر وئریر. اولوسلار آراسی عفو اؤرگوتو ایندییه قدر ۳۰۴ قوربانین آدینی آچیقلادی و اؤلنلرین بو تخمیندن داها چوخ اولدوغونو وورغولادی.
وئریلن راپورلاردا ۹۸ آبان قیرغی‌نینین اؤلچولری ایرانین چاغداش تاریخینده گؤرونمه‌دیگی دئییلیر.
بو باخیمدان، “اعداما قارشی بیرلیکده”، “ایرانا عدالت” و “ایران اینسان حوقوقلاری” آدلی اوچ تشکیلات، گلن ایلین بهمن آییندا هلندین لاهه شهرینده‌کی “آبان اولوسلارارسی خالق محکمه‌‌سی” نین آبانداکی اعتراض آکسییالارینی باسدیرانلارین یارغیلانماسی آماجی ایله کئچیره‌جکلر.
