سرهنگ بهرام امیرفرهودی ایران مئدیاسینا بو جینایتین آیرینتیلاری باره‌ده دئییب: “بو شهرین محله‌‌‌لریندن بیرینده بیر عائله‌‌‌ عضولری‌نین اؤلدورولمه‌سیندن سونرا بو مسئله‌‌ اؤزل اولاراق جینایت پولیسی‌نین گوندمینه آلینیب”.

او آرتیریب: “ایلکین آراشدیرمالار زامانی بللی اولوب کی، عائله‌‌‌نین ۵۱ یاشلی آتاسی ۴۴ یاشلی حیات یولداشینی، ۱۵ یاشلی قیزی و ۱۱ یاشلی اوغلونو “عائله‌‌‌ موناقیشه‌لری” نه‌دنی ایله قتله یئتیریب.

قاتیلین طالعیینه گلینجه، امیر فرهودی جینایتین باش وئرمه‌سیندن سونرا قاتیلین شهر کوچه‌لریندن بیرینده اینتیهارا جهد ائتدیگینی دئییب.

ایراندا سون ایللر عائله‌‌‌ قتللری اؤنملی درجه‌‌‌ده آرتیب و بو، قادین و اوشاق حوقوقلاری ساوونوجولاری‌نین ناراحاتلیغینا سبب اولوب.

دونن اصفهانین پولیس کوماندیری‌نین معاونی کئچن ایل ایالتین بیر کندینده ایتکین دوشموش اصفهانلی نازگل آدلی کیچیک قیزین آناسی و دایی‌سی‌نین حبس اولوندوغونو آچیقلاییب. اصفهان ایالتی‌نین بو پولیس یئتکیلی‌سی‌نین سؤزلرینه گؤره، نازگل آپلی اوشاغین آناسی و دایی‌سی حبس اولوندوقدان سونرا اونون قتلینی اعتراف ائدیبلر.

بو یئددی یاشلی قیزین اصفهان کندلریندن بیرینده یوخا چیخماسی خبری اؤتن ایلین اسفند آییندا یاییلیب و اونون ایتمه‌سیندن بیر آی سونرا اونون قیسماً یانمیش جسدی ترک ائدیلمیش بیر ائوده تاپیلیب.