بوتون آیفون ۱۴ مودئللری‌نین ایرانا ایدخالینا قاداغا قویولوب
ایران ایسلام جمهورییتی‌نین صنعت، معدن و تیجارت ناظرلیگی هر تورلو یولجو و پوست یولو ایله آیفون ۱۴ ایدخالینا قاداغا قویوب.
ایران مئدیالاریندا ایران ایسلام جمهورییتی‌نین گؤمروک مکتوبونون تصویری درج اولونوب و اورادا بیلدیریلیر کی، صنعت، معدن و تیجارت ناظرلیگی‌نین امری ایله بو ایلین اسفند آیینین اولیندن اعتباراً صنعت، معدن و تیجارت ناظرلیگی هر تورلو یولجو و پوست یولو ایله آیفون ۱۴ ایدخالینا قاداغا قویوب.
بو مکتوبدا بوتون گؤرولی ایداره‌لردن خواهش اولونور کی، قئید اولونان تاریخدن اعتباراً داخیل اولان بو تلفونلارین بیلگیلری یولجو و پوست سیستمینده قئیدیاتا آلینماسیندان چکینسینلر.
۱۳۹۹-جو ایلین شهریور آییندا ایران ایسلام جمهورییتی‌نین لیدری علی خامنه‌ای حؤکومته “لاکچری آمریکا تلفونلاری‌نین (آیفون)” ایدخالی‌نین قاریسینی آلینماسینی امر ائتدی.
خامنه‌ای آیفونلارین ایدخالی ایله باغلی ناراحاتلیغینی دیله گتیریب و دئییب: ۱۳۹۸-جی ایلده بو تیپ تلفونلارین ایدخالینا یاریم میلیارد دلار خرجله‌نیب، اونون سؤزلرینه گؤره، بونلارا گرک یوخدور.
ایرانا آیفون ایدخالینا قاداغاسی اونون اساس رقیبی سامسونگ، گالکسی ۲۳ اولترانین ایراندا قیمتی‌نین ۷۰ میلیون تومنه چاتدیغی بیر واختدا آچیقلانیب و بو قاداغا ایله اونون قیمتی‌نین آرتاجاغی گؤزله‌نیلیر.
