بریتانییا: قاچان محبوس تئررورچولوق و ایرانلا ایلیشگی ایله اتهام اولونوردو
بیر محبوسون قاچماسی خبری‌نین یاییلماسیندان بیر نئچه ساعت سونرا بریتانییا حؤکومتی “تئررورچولوق” و “ایرانلا ایلیشگیسی” اله اتهام اولونان قاچان محبوسو تاپاجاغینا سؤز وئریب.
بریتانییا مئدیاسی‌نین وئردیگی بیلگیلره گؤره، ۲۱ یاشلی “دانیل عابد خلیفه” چارشنبه گونو لوندوندا حبس‌خانادان قیدا ماشینی‌نین آلتیندا گیزلنه‌رک قاچیب.
بو محبوسون قاچماسیندان بیر گون کئچمه‌سینه باخمایاراق، پولیس هله ده اونو تاپا بیلمه‌ییب و بؤیوک بریتانییادا عومومی آختاریشلار آپاریلیر. یئتکیلیلرین سؤزلرینه گؤره، بو آختاریشلارا گؤره اوچاق و گمیلرین اوچوشلاری گئجیکیر.
بریتانییا اوردوسونون کئچمیش عسکری دانیل عابد خلیفه دوشمن طرفیندن بیرباشا و یا دولاییسی ایله ایستیفاده اولونا بیله‌جک گیزلی بیلگیلر توپلاماغا جهدده اتهام اولونور.
بی‌بی‌سی اونون ایرانین خئیرینه جاسوسلوقدا اتهام ائدیلدیگینی و آیریجا بریتانییا حربی بازاسینا “ساختا بومبالار” یئر‌لشدیرمه‌یه چالیشدیغینی بیلدیریب.
اونون بوتون اتهاملاری تئررورچو کیمی تصنیف ائدیلیب و او، لوندونداکی وندز ورث حبس‌خاناسیندان قاچدیقدان سونرا بؤیوک بریتانییانین هاوا لیمانلاریندا و لیمانلاریندا گوونلیک تدبیرلری گوجلندیریلیب.
بریتانییا پولیسی اونون عائله‌‌‌سینی، دوستلارینی، اوردوداکی همکارلارینی و حبس‌خاناداکی دوستلارینی سورغو-سؤال ائده‌جکلرینی، مکتوبلارینی و تلفون زنگلرینی حبس‌خانادا آراشدیراجاقلارینی آچیقلاییب. بریتانییا ساوونما ناظرلیگی بو ایلین ماییندا همین شخصه قارشی اتهاملار ایره‌لی سورولدوکدن سونرا اوردودان قووولدوغونو تصدیقله‌ییب.
بو شخصین حبس‌خانادان قاچماسی اؤزللیکله بؤیوک بریتانییادا حؤکومتین موخالیفت پارتیلری‌نین گئنیش تنقیدی ایله اوزلشیب. اونلار بو جور اتهاملاری اولان شخصین عادی حبس‌خانادا ساخلانماسینی سرت تنقید ائدیبلر.
بو واختا قدر بو قاچان محبوسلا ایسلام جمهورییتی آراسینداکی ایلیشگی حاقیندا داها آیرینتیلی بیلگی یاییلماییب.
