برجام طرفدارلاریندان بیری ایکی ایل حبس جزاسینا محکوم ائدیلدی
بیر وکیل «شکیبا شاکرحسینی»نین، «نووه سازیشینه (برجام) دستک وئرن میتینقه قاتیلدیغی اوچون» 2 ایل حبس جزاسینا محکوم ائدیلدیگینی آچیقلادی.
بو وکیل بیلدیریب کی، «شاکرحسینی»، آمریکانین ایسلام جمهورییتینه قارشی سیاستینه اعتراض ائتمک اوچون 1394-جی ایلده لندن‌ده کئچیریلن اعتراض میتینقینده ایشتیراک ائتمیشدی، لاکین ایراندا «میلی تهلوکه‌‌‌سیزلیگه قارشی حرکت ائتمک» اتهامی ایله محکوم ائدیلیبدیر.
رویداد 24 خبر وئریر کی، میتینقدن بیر نئچه ایل سونرا خانیم شاکرحسینی‌نین پرونده‌سی تشکیل تاپدی و محکمه اونو ایکی ایل حبس جزاسینا محکوم ائتدی.
شاکرحسینی حاضیردا ایراندادیر و گیروو موقابیلینده آزاددیر. اونون وکیلی امیر رئیسیان دا مووکیلی‌نین پرونده‌سینده یگانه اتهامین لندن‌ده کئچیریلن عینی میتینق اولدوغونو سؤیله‌دی.
رئیسیان علاوه ائدیب کی، مووکیلی‌نین بو حرکتی «قارشی‌دورما و معانیدلرله گیزلی آنلاشما»، ساییلیب و او، میلی تهلوکه‌‌‌سیزلیگه قارشی حرکت ائتمک اتهامی ایله 2 ایل حبسه محکوم ائدیلیبدیر.
او آرتیردی «حؤکمون بیر حیصه‌‌‌سی تعلیق اولونوب، لاکین بو اتهام اوچون هئچ بیر اساس اولمادیغیندان محکمه قراری‌نین یئنیدن گؤزدن کئچیریلمه‌سینی طلب ائتمک نيتیندییک.»
