باتی آذربایجان بندلری‌نین آرخاسینداکی سویون حجمی کئچن ایلله موقایسه‌‌ده یوزده ۲۱ آزدیر
باتی آذربایجان بؤلگه سو شرکتی‌نین باش مودیری دئدی: سون حسابلامالارا گؤره، ایالتده‌کی بندلرین آرخاسینداکی سویون حجمی کئچن ایله گؤره یوزده ۲۱ آزالاراق ۸۷۸ میلیون متر مکعبه چاتیب.
او علاوه ائتدی: ایالتین ان بؤیوک سو رزروی اولاراق ۸۰۸ میلیون متر مکعب حجمینده اولان بوکانین شهید کاظمی سو بندی، حاضردا تخمیناً ۳۲۵ میلیون متر مکعب سو حجمینه مالیکدیر.
باتی آذربایجان بؤلگه سو شرکتی‌نین باش مودیری دئدی: بو گؤستریر کی، بو بؤیوک بندین حجمی‌نین تخمیناً یوزده ۴۰ سو ایله دولودور و بو، ایالتین سو حؤوضه‌سینده ال‌وئریشسیز وضعيتدیر.
او باتی آذربایجاندا یئرآلتی سولارین ایجازه‌سیز چیخاریلماسی‌نین قارشیسینی آلماق اوچون گؤرولن تدبیرلره توخوناراق علاوه ائتدی: بو ایلین ایلک دؤرد آییندا ۱۰۸ قئیری -قانونی قویو باغلانمیشدیر کی، بو دا اؤتن ایلین عینی دؤورونده ۱۱۴ ایدی.
سون ایللرده سو بؤحرانی ایرانین بیر چوخ بؤلگه‌سینده گئنیش یاییلمیش اعتراضلارا نه‌دن اولموشدور.
بو ایل تیر آیینین سون هفته‌سینده خوزیستانلیلار ایالتده‌کی سو بؤحرانینا اعتراض اولاراق کوچه‌لره چیخدیلار. اولوسلاراراسی عفو اؤرگوتونه گؤره، اعتراضچیلارا ائدیلن باسقین ۹ وطنداشین اؤلومونه سبب اولوب. آیریجا باشقا ایالتلرده ده خوزیستانلیلارا دستک اولاراق کوچه‌لره چیخان چوخ سایدا وطنداش حبس ائدیلدی.
