باتی آذربایجاندا کرونانین آغیر وضعيتی؛ هر ۴ دقیقه‌ده بیر نفر یولوخور
باتی آذربایجان طب علملری بیلیم‌یوردونون رئیسی دئدی: ایالتده کرونا خسته‌لیگی‌نین یاییلماسی او قدر پیسلشدی کی، هر دؤرد دقیقه‌ده بیر نفر کووید ۱۹ خسته‌لیگینه گؤره خسته‌خانایا یئر‌لشدیریلیر.
جواد آقازاده، سون ۲۴ ساعت ایچینده باتی آذربایجاندا یوکسک بیر رقم اولان ۱۳۵۱ نفرین کرونایا یولوخدوغونو سؤیله‌دی و دئدی: بونلاردان ۳۵۷ نفری باتی آذربایجاندا خسته‌خانایا یئر‌لشدیریلیب و بو باخیمدان هله ده زیروه‌دییک.
باتی آذربایجان طب علملری بیلیم‌یوردونون رئیسی دئدی: بو رقمین آرتیریلماسی ایله ایالتده کسکین تنفوس سندروملو خسته‌لرین توپلام سایی ۱۸۱۶ نفره چاتدی.
آقازاده، ۲۷۶ کرونا خسته‌سی‌نین باتی آذربایجان طبّ مرکزلری‌نین اؤزل باخیم شؤبه‌لرینه یئر‌لشدیریلدیگینی بیلدیردی و دئدی: “بونلاردان ۶۱ نفری ونتیلاتور ایله نفس آلیر“.
کووید ۱۹ خسته‌لیگی سببیندن سون ۲۴ ساعت ایچینده ۱۲-سی اورمیه‌ده اولماقلا باتی آذربایجاندا ۲۳ آدامین اؤلومونه توخوناراق دئدی: بو رقمین علاوه ائدیلمه‌سی ایله اؤلنلرین توپلام سایی ۵ مین ۱۷۹ نفره چاتدی.
ایندییه قدر باتی آذربایجاندا ۲۱۷ مین ۶۳۷ نفر کرونایا یولوخوب، اونلاردان ۲.۴ فایزی حیاتینی ایتیریب.
iranwire
