باتی آذربایجانداکی کرونا خستهلرینین سایی یئنیدن یوکسه‌له‌رک ۳ رقمه چاتدی
باتی آذربایجان طب علملری بیلیم‌یوردونون کئچیجی رئیسی سون ۲۴ ساعتدا ایالتده ۱۱۱ نفرده کرونا خسته‌لیگی‌نین تثبیت ائدیلدیگینی و اونلاردان ۵۶ نفری‌نین خسته‌خانایا یئر‌لشدیریلدیگینی بیلدیریب.
محمدامین ولی زاده بیلدیردی: بو قدر خسته‌نین خسته‌خانایا یئر‌لشدیریلمه‌سی ایله باتی آذربایجاندا خسته‌خانایا یئرلشدیریلن کرونا خستهلرینین توپلام سایی ۳۴۵ نفره چاتدی.
او ۹۳ خسته‌نین اؤزل باخیم شؤبه‌لرینده خسته‌خانایا یئر‌لشدیریلدیگینی و ۳۱ نفرین ونتیلاتورلا نفس آلدیغینی ایفاده ائتدی.
ولی‌زاده داوام ائتدی: سون ۲۴ ساعتدا ۲۸ نفر اورمیه‌ده، ۹ نفر قوشاچای‌دا و خویدا ۸ نفر ایالتده ان چوخ خسته‌یه مالیک اولوبلار.
او بیلدیردی ۱ نفرین اؤلومو ایله باتی آذربایجاندا کرونا اؤلوملری‌نین توپلام سایی ۷ مین ۲۴۳ نفره چاتدی.
اونون دئدیگینه گؤره ایندییه قدر باتی آذربایجاندا بیرینجی و ایکنیجی دوز آشی اولماقلا توپلام ۴ میلیون ۸۲۸ مین دوز کرونا آشیسی وورولوب.
ولی‌زاده دئدی کی، بو قدر کرونا آشیسیندان ۱۳ مین دوزو سون ۲۴ ساعتدا وورولوب.
