بؤیوک تهران حبس‌خاناسیندا آکسییا کئچیرنلر شدته معروض قالیبلار
حوقوق ساوونوجولاری‌نین راپورلاری گؤستریر کی، حبس‌خانا نظارتچیلری بؤیوک تهران حبس‌خاناسیندا سیاسی محبوسلارا سالدیریب و اونلاری شدتله دؤیوبلر.
بو بیلگیلره گؤره، بؤیوک تهران حبس‌خاناسیندا آجلیق آکسییاسی کئچیرن سیاسی محبوسلار دونن طب مرکزینه آپاریلیب و اورادا بیر نئچه موحافیظه‌‌‌چی طرفیندن شدتلی شکیلده دؤیولوبلر.
حمید حاج جعفر کاشانی، سعید تمجیدی، امیرحسین مرادی، محمد ابوالحسنی و محمد ترکمانی حبس‌خانا موحافیظه‌‌‌چیلری‌نین سالدیرسینا معروض قالان محبوسلاردیر.
سیاسی محبوس خبرلرینی درج ائدن ۱۵۰۰ تصویر توییتر صفحه‌‌‌سی بو حادثه ایله باغلی یازیب: موحافیظه‌‌‌چیلردن بیری امیر حسین مرادی‌نین قارنینا تپیکله ووروب و او هوشونو ایتیریب. حکیم و یا طب باجیسی اولدوغو بللی اولمایان باشقا شخص ایسه بیچاقلا محبوسلارا هوجوم ائدیب. اونلاردان بیری ده اونلاری سلاحلا تهدید ائدیب. قالان ۳۰ نفر محبوسلاری کابل و یومروقلارلا دؤیوردولر.
ایران حبس‌خانالاریندا آجلیق آکسییاسی ۱۸ دی-ده موعالیجه‌‌‌نین گئجیکمه‌سی سونوجوندا دونیاسینی ديیشن بکتاش آبتینین اؤلوموندن سونرا باشلاییب.
بو حادثه‌‌‌دن سونرا اوین، بؤیوک تهران و قارچک حبس‌خانالاریندا بیر سیرا سیاسی محبوسلار آجلیق آکسییاسینا باشلاییب و ایسلام جمهورییتی حؤکومتیندن بکتاش آبتینین اؤلومونه گؤره سوروملولوغو اؤز اوزرینه گؤتورمه‌سینی طلب ائدیبلر.
