اینقیلاب محکمه‌‌سینه چاغیریلان دؤرد تورک مدنی فعال محکمه‌لری‌‌نین آچیق کئچیریلمه‌سینی ایسته‌ییبلر
۱۶ تیر ۱۴۰۳-ده ایره‌لی سورولن اتهاملاری ساوونماق اوچون محکمهیه چاغیریلان داود شیری، جواد احمدزاده، حسین امانی نادارلی و علیرضا صبری، محکمه اوتوروملاری‌نین آچیق کئچیریلمه‌سینی ایسته‌ییبلر.
ثنا سیستمی واسطه‌‌‌سیله جناب شیری‌یه وئریلن بیلدیریشده، “ایسلام جمهورییتینه قارشی تبلیغات”، “توپلاشماق و داخیلی/خاریجی تهلوکه‌‌‌سیزلییه قارشی جینایت تؤرتمک اوچون ال بیر اولماغا تشبوث”، “اؤلکه‌نین موخالیفت قروپلارینا عضولوک (بؤلوجو قروپلارا عضولوک) ” اتهاملارینا یئتیرمک اوچون بو مدنی فعالدان تبریز اینقیلاب محکمه‌‌سی‌نین ایکینجی شؤبه‌سینده اولماسی ایسته‌نیلیب. چوخ گومان کی، باشقا فعاللارا قارشی اتهاملار دا جناب شیری‌یه قارشی ایره‌لی سورولن اتهاملار کیمیدیر.
بوندان اؤنجه تبریزین ایکینجی جینایت محکمه‌‌سی‌نین ۱۲۰-جی شؤبه‌سی داود شیری، جواد احمدزاده، حسین امانی نادارلی و علیرضا صبری، آدلی دؤرد تورک مدنی فعالین پرونده‌سینی صلاحیتیندن کنار اولدوغونو اعلان ائده‌رک، بو فعاللارین پرونده‌سینی تبریز اینقیلاب محکمه‌‌سینه وئرمیشدی.
داود شیری، حسین امانی، جواد احمدزاده و علیرضا صبری، ۲۸ اردیبهشت ۱۴۰۲-ده گوونلیک گوجلری طرفیندن ساخلانیلمیش و بیر آیدان سونرا محکمهیه قدر مووقتی اولاراق گیروو قارشیلیغیندا سربست بوراخیلمیشدیر.
